Кездесуге АҚШ Мемлекеттік хатшысының орынбасары Кристофер Ландау және басқа да ресми тұлғалар қатысты.
Келіссөздер барысында Өзбекстан мен АҚШ арасындағы стратегиялық серіктестік қатынастарын дамыту, сондай-ақ 23 қыркүйекте Нью-Йорк қаласында жоғары деңгейде қол жеткізілген уағдаластықтарды жүзеге асыру мәселелері талқыланды.
Кездесу басында Сержио Гор Мемлекет басшысына АҚШ Президенті Дональд Трамптың сәлемін және ізгі тілектерін жеткізді.
Тараптар кейінгі жылдары саяси диалогтың жанданып, түрлі деңгейлерде өзара жұмыс сапарлары мен іскерлік байланыстар нығайып келе жатқанын айтты. Тауар айналымының артуы, сондай-ақ қазан айының басында АҚШ Сауда палатасы делегациясының Өзбекстанға сапарының сәтті өткені атап өтілді.
Қабылданған «жол картасы» аясында өнеркәсіп, қаржы, маңызды минералдар, энергетика, цифрландыру, ауыл шаруашылығы және басқа да басым бағыттардағы бірлескен жобаларды ілгерілету қажеттігі сөз болды.
Сонымен қатар тараптар қауіпсіздік, терроризм мен экстремизмге, заңсыз көші-қонға қарсы күрес салаларындағы ынтымақтастықты нығайту мәселелерін талқылады.
Әңгіме барысында жаһандық және өңірлік маңызы бар өзекті мәселелер бойынша пікір алмасылды.
Кездесуде алдағы іс-шаралар жоспары, соның ішінде келесі аптада Вашингтон қаласында өтетін «С5+1» форматындағы саммитке дайындық мәселелері де қаралды.
