Кездесуде Өзбекстан мен Әзербайжан арасындағы достық, стратегиялық серіктестік және одақтастық қатынастарды одан әрі нығайту, ынтымақтастықтың басым бағыттарында кооперация мен алмасуды кеңейту мәселелері талқыланды.
Өзбекстан Президенті бұл жолғы мемлекеттік сапар мен Жоғары мемлекетаралық кеңестің екінші отырысы екі ел арасындағы дипломатиялық қатынастар орнағанына 30 жыл толған жылы өтіп жатқанын ерекше атап өтті.
- Бұған дейін тарихта екі ел арасындағы қарым-қатынас ешқашан дәл қазіргі деңгейдегідей жоғары болмаған, – деді Мемлекет басшысы.
Президенттер көпқырлы әріптестік барлық деңгейде қарқынды дамып келе жатқанын атап өтті. Кеше Хиуа қаласында алғашқы Парламентаралық форум, Бакуде Үкіметаралық комиссияның және Өңірлер форумының сәтті өтуі, сондай-ақ Әндіжанда Ректорлар форумы аясында 60-тан астам келісімшартқа қол қойылуы соның айғағы. Сонымен бірге, Әзербайжанның «Ширван» ансамблі Хиуадағы жыраулар фестивалінде гран-при иегері атанды.
Экономикалық кооперация жылы аясында екі ел арасындағы тауар айналымы 25 пайызға артып, жобалар портфелі 4 миллиард долларға жеткен. Қазіргі таңда 300-ге жуық бірлескен кәсіпорын жұмыс істеуде.
Сапар барысында Баку қаласында «Өзбекстан» саябағының құрылысы басталып, еліміздің Әзербайжандағы жаңа елшілік ғимаратының ашылуы өтеді.
Парламенттер, үкіметтер, министрліктер және өңірлер арасындағы ынтымақтастықты жалғастыруға уағдаласты. Халықаралық ұйымдар аясында өзара қолдаудың маңыздылығы да атап өтілді.
Тауар айналымы мен инвестициялар көлемін жылына 1 миллиард долларға дейін жеткізу мүмкіндіктері жан-жақты қаралды. Бұл мақсатта өнеркәсіп, инфрақұрылым, ауыл шаруашылығы, денсаулық сақтау, туризм, банк салалары бойынша жобаларды қамтитын арнайы Кооперация бағдарламасы қабылданбақ.
Бірлескен инвестициялық компанияның қызметін кеңейту, Кәсіпкерлер кеңесі мен Өнеркәсіп және экономикалық аймақтар форумы сынды жаңа форматтарды қолдау қажеттілігі атап өтілді.
Көлік-коммуникация саласындағы әріптестікке де ерекше назар аударылды. Орта дәлізді дамытудағы бірлескен жобалар талқыланды.
Осы дәліз арқылы тасымалданатын Өзбекстан жүктерінің көлемі 25 пайызға өсіп, 1 миллион тоннадан асқаны айтылды. Биыл наурыздан бастап жүк тасымалдауда электронды рұқсат жүйесі енгізілгені де маңызды оқиға болды.
Сонымен бірге, Еуропаға электр энергиясын экспорттау бойынша бірлескен жобаны жедел әзірлеу туралы уағдаластыққа қол жеткізілді.
Дипломатиялық қарым-қатынастардың 30 жылдығын лайықты атап өту мақсатында тараптар биылғы күзде бірлескен мәдени және жастар шараларын өткізуге келісті.
Мемлекет басшылары халықаралық және өңірлік маңызы бар мәселелер бойынша да пікір алмасты.
Жиында Үкіметаралық комиссия тең төрағалары, көлік, энергетика және мәдениет министрлері кездесу күн тәртібіндегі мәселелер бойынша есеп берді.
Кеңес қорытындысында «жол картасын» қабылдау туралы келісімге қол жеткізілді.
