Мемлекет басшысы 2024 жылы құрылған Мемлекетаралық Жоғары кеңес форматы өзінің өзектілігі мен тиімділігін толық дәлелдегенін атап өтті.
– Бүгінде біздің қарым-қатынасымыз стратегиялық серіктестік пен одақтастықтың ең жоғары деңгейіне көтерілді, – деді Шавкат Мирзиёев.
Тараптар ынтымақтастықтың жаңа бағыттарын, екіжақты әлеуетті барынша тиімді пайдаланудың жолдарын жан-жақты талқылап, Өзбекстан–Қазақстан серіктестігін айтарлықтай кеңейтетін бірқатар шешімдер қабылдады.
Өзара сауданың тұрақты өсімін қамтамасыз етуге, оның құрылымын әртараптандыруға және бизнес үшін қолайлы жағдай жасауға айрықша көңіл бөлінді.
Жыл басынан бері тауар айналымы 4 миллиард долларға жеткені айтылды. Бұл көрсеткішті 2030 жылға қарай 10 миллиард долларға жеткізу мақсаты қойылған.
Бұл үшін барлық қажетті жағдай жасалған, сауда және инвестициялық келісімдердің ауқымды топтамасы қалыптастырылған, «УзКазТрейд» компаниясы құрылған, іскер топтар арасында тікелей ынтымақтастық тетіктері жолға қойылған.
Мемлекет басшысы өнеркәсіптік кооперация саласында қол жеткізілген ірі жетістіктерді атап өтті.
Сапар аясында «Орталық Азия» халықаралық өнеркәсіптік кооперация орталығы және құны 1,3 миллиард доллар болатын бірқатар маңызды жобалар іске қосылады. Бұдан бөлек, жалпы құны 8 миллиард доллардан асатын, оның ішінде химия, геология, инфрақұрылым, логистика, агроөнеркәсіп және басқа да көптеген бағыттарды қамтитын ауқымды Өнеркәсіптік кооперация бағдарламасы дайындалды.
Көлік және логистика саласындағы жүйелі әріптестік басым бағыт ретінде атап өтілді. Жаңа көлік дәліздерін, соның ішінде «Үшқұдық – Қызылорда» бағытын дамыту, сондай-ақ Ақтау, Құрық және Харгос порттарында жүк тасымалын ынталандыру бойынша бірлесіп жұмыс жүргізу қажеттігі көрсетілді.
Энергия ресурстарын тасымалдау және қайта өңдеу, энергия үнемдеу, «жасыл» технологияларды және ақпараттық технологияларды енгізу салаларында өзара тиімді ынтымақтастықты кеңейтуге дайындық білдірілді.
Су-экология бағытындағы әріптестікті одан әрі нығайту үшін тиімді шаралар қабылданатын болды. Тараптар сапар аясында Трансшекаралық су нысандарын бірлесіп басқару және оларды пайдалану туралы келісімнің қол қойылуын құптады.
Көшбасшылар гуманитарлық байланыстардың маңызды орын алатынын атап өтті. Биыл Алматы мен Астана қалаларында «Лазги» балеті, суретшілер көрмесі, әдебиет форумы және жастар фестивалі сынды бірлескен мәдени шаралар, сондай-ақ Қазақстан медицинасы күндері мен Ташкенттегі Астана күндері табысты өткені айтылды.
Ғылым және білім құрылымдары, жастар ұйымдары арасындағы алмасуларды жалғастыру, жоғары оқу орындары арасындағы бірлескен бағдарламаларды кеңейту жөнінде уағдаластық жасалды.
Бірлескен туристік бағыттарды әзірлеу, Өзбекстан мен Қазақстанның тарихи қастерлі орындары, бай мәдени және рухани мұрасын кеңінен насихаттаудың маңызы атап өтілді.
Сондай-ақ келіссөздер күн тәртібі бойынша Премьер-министрлердің орынбасарлары, энергетика, көлік және мәдениет министрлерінің есебі тыңдалды.
Мемлекетаралық Жоғары кеңестің екінші отырысының қорытындысында бірқатар маңызды қаулылар қабылданды.
