Онда Өзбекстан мен Словакия арасындағы жан-жақты практикалық ынтымақтастықты одан әрі дамыту мәселелері талқыланды.
Келіссөз басында Мемлекет басшысы осы сапардың Өзбекстан мен Словакия арасындағы көпжақты қатынастар тарихында сапалық тұрғыдан жаңа кезеңнің бастауы болатынын ерекше атап өтті.
Тараптар барлық бағыттарда қарым-қатынастардың қарқынды дамып келе жатқанына ризашылық білдірді. Сыртқы істер министрліктері деңгейінде сындарлы саяси диалог орнаған, іскерлік және гуманитарлық байланыстар жанданған.
Тауар айналымының өсіп келе жатқаны айтылды. Мамыр айында Үкіметаралық комиссияның алғашқы отырысы табысты өтті. Ынтымақтастықтың жаңа бағыттары мен бірқатар бірлескен жобалар пысықталуда.
Қазіргі заманғы сын-қатерлер мен халықаралық жағдайдың алдын ала болжап болмайтындығын ескере отырып, сыртқы саясат ведомстволары, соның ішінде еуропалық құрылымдармен жүйелі әріптестік пен өзара үйлестіруді жолға қоюдың маңыздылығы сөз болды.
Тараптар өзара жеткізілетін тауарлар түрлерін кеңейту арқылы екі ел арасындағы тауар айналымын арттырудың маңызын ерекше атап өтті.
Атап айтқанда, Өзбекстаннан Словакияға тоқыма, ауыл шаруашылығы өнімдері, электротехника, химия өнімдері мен полимерлер, ал Словакиядан Өзбекстанға каучук, автокөлік бөлшектері, фармацевтика және басқа да өнеркәсіптік тауарлар жеткізу көзделіп отыр.
Техникалық реттеу және метрология салаларында қол қойылатын келісімдер аясында техникалық кедергілерді жою және кванттық эталон зертханасын іске қосу мәселелерінің өзектілігі де атап өтілді.
Словакияның озық компанияларымен өнеркәсіптік кооперацияны дамыту мақсатында ауқымды бағдарлама дайындауға келісілді. Атап айтқанда, агроөнеркәсіп кешені, автокөлік бөлшектерін жергіліктендіру, фармацевтика өнімдерін өндіру, «жасыл» энергетика және туризм салаларындағы жобаларды іске асыруға уағдаластыққа қол жеткізілді.
Цифрлық шешімдерді енгізу және стартап инвестициялары саласында үлкен мүмкіндіктер бар екені айтылды. Осы орайда IT стартаптарын акселерациялау бойынша бірлескен венчурлық қор құру мәселесі қаралды.
Сондай-ақ, тараптар бірлескен жобаларды қолдау үшін қолда бар қаржылық тетіктерді кеңінен пайдалану ұсынылды.
Гуманитарлық салада – білім беру және академиялық алмасу бағытындағы ынтымақтастық екі тарапқа да тиімді екені расталды. Братиславадағы Коменский университетінің қатысуымен бірлескен ғылыми-зерттеу бағдарламаларын жолға қою жөнінде келісімге қол жеткізілді.
Мәдениет саласында өзара көрмелер, фильм көрсетілімдері, концерттер және музей ісі бойынша жобаларды қамтитын ынтымақтастық бағдарламасын қабылдау туралы келісімге келінді.
Ұйымдастырылған еңбек көші-қоны мәселелеріне де ерекше назар аударылды. Словакия тарапы бұл бағытта жүйелі әріптестікті жолға қоюға мүдделі екенін айтылды.
Халықаралық маңызы бар мәселелер, соның ішінде көпжақты алаңдарда өзара қолдау көрсету жайы да талқыланды.
Қабылданған шешімдер мен келісімдерді уақытылы әрі сапалы жүзеге асыру мақсатында екі ел үкіметтері тарапынан кешенді «жол картасын» қабылдау жөнінде уағдаластыққа қол жеткізілді.
