Мемлекет басшысы өткен жылдың 10 қарашасында медицина және фармацевтика саласының қызметкерлерімен өткен кездесуде медициналық қызметтердің 30 пайызы жекеменшік сектор тарапынан көрсетіліп отырғанын, алдағы уақытта денсаулық сақтау саласында жекеменшік секторды қолдау және оларға қолайлы жағдайлар жасау жұмыстары жалғасатынын атап өткен болатын.
Соған сәйкес елімізде көпсалалы медициналық орталықтардың қызметіне кең мүмкіндіктер жасалуда.
Алмазар ауданында орналасқан «Sinomed» көпсалалы медициналық орталығы бүгінде өзекті саналатын барлық бағыттарда, атап айтқанда, босандыру, педиатрия, хирургия, травматология, ортопедия, эндокринология және басқа да салалар бойынша қызмет көрсетіп келеді. Орталық 30 миллион АҚШ доллары көлеміндегі инвестиция есебінен салынған, мұндағы медициналық жабдықтар Ұлыбритания, Италия, Жапония және Германиядан әкелінген.
Клиникада диагностика және стационар бөлімдері бар. Орталық жылына 4,5 мың науқасты қабылдау мүмкіндігіне ие. Мұнда 300-ден астам жұмыс орны ашылып, 80-нен аса дәрігер еңбек етеді. Олардың 60-ы шетелде, соның ішінде Оңтүстік Корея, Германия, Түркия, Үндістан, Жапония, АҚШ секілді елдерде біліктілігін арттырған мамандар. Сонымен қатар, клиникада шетелдік дәрігерлер де жұмыс істейді.
Орталықтың құрамында Ташкент қаласындағы алғашқы жекеменшік босандыру кешені іске қосылған. Заманауи талаптарға сай жабдықталған бұл нысан бір мезетте 30 анаға медициналық қызмет көрсетуге мүмкіндік береді. Алдағы кезеңде кешеннің сыйымдылығын ұлғайтып, қызмет көрсету аясын кеңейту жоспарланып отыр. Сонымен қатар мұнда балаларды вакцинациялау, профилактикалық медициналық тексерулер жүргізу үшін де барлық қажетті жағдай жасалған.
Клиникада колл-орталықтар мен арнайы патронаж топтары құрылған. Науқастарды үйіне барып тексеру мүмкіндігі де бар.
Сонымен қатар, мұнда республикадағы ең ірі жекеменшік вакцинация орталығы, сондай-ақ жекеменшік сектордағы бірегей стерилизация орталығы жұмыс істейді.
Мемлекет басшысы орталықта көрсетіліп жатқан медициналық қызметтер, науқастарға жасалған жағдайлар, соның ішінде амбулатор емдеу бөлмелерімен танысты.
Сондай-ақ ана мен бала денсаулығын қорғау бағыты аясында әйелдің жүктілік кезеңінен бастап босануға дейінгі, босану мен босанғаннан кейінгі уақытты толық қамтитын, өзара сабақтас әрі жүйелі медициналық үдерістер жан-жақты таныстырылды.
– Босандыру қызметі, әсіресе босануға дейінгі жүйелі бақылау – ана мен бала денсаулығын қамтамасыз етудегі ең өзекті бағыттардың бірі. Алғашқы сәбиін дүниеге әкелетін әйел үшін бұл кезең үрей мен күйзеліске емес, сенім мен тыныштыққа толы болуы тиіс. Егер жүктілік барысында әйел тұрақты дәрігерлік бақылауда болып, қажетті ем-шараларды дер кезінде алса, өз денсаулығына жауапкершілікпен қарау, салауатты аналық пен дені сау балалық мәдениеті біртіндеп қалыптасады, – деді Президент.
Мемлекет басшысы көпсалалы орталықта ұйымдастырылған балалар алаңында ойнап жүрген бүлдіршіндермен де әңгімелесті.
– Ең үлкен жетістігіміз – сіздер сияқты дәрігерлердің алған білімін өз елімізде қолданып отырғаны. Сонымен бірге жекеменшік медицинаны дамыту барысында бәсекені де ұмытпауымыз керек. Бәсеке болған жерде таңдау болады. Жекеменшік емдеу орталықтары көбейген сайын халық өзі төлеген қаржысына сай сапалы қызмет алады, – деді Президент клиника ұжымымен сұхбатында.
