Бүгінде ауыл шаруашылығындағы механикаландыру деңгейі 81 пайызды құрайды. Соңғы жылдары 1756 дана мақта теру машинасы сатып алынып, мақта жинаудың механикаландыру деңгейі 52 пайызға жетті. Өткен маусымда 2,1 миллион тонна мақта техника көмегімен жиналды. Соның нәтижесінде соңғы бес жылда қол еңбегі 1,8 есеге қысқарды.
Келесі орындайтын міндет – мақтаны машинамен жинау үлесін кемінде 70 пайызға жеткізу. Ол үшін 2026 жылы 800 дана мақта теру машинасын, сондай-ақ 6 мың сеялка, трактор және комбайн сатып алу жоспарланған. Жалпы, жыл бойы 10 мың жаңа техника алынып, ауыл шаруашылығы техникасы паркін 292 мың бірлікке жеткізу көзделіп отыр.
Жаңа техникаларды фермерлерге қолайлы шарттармен лизингке беру мақсатында халықаралық қаржы институттарынан 400 миллион доллар тарту жоспарланған. Техника ұлттық валютада 2 жылдық жеңілдік кезеңімен 10 жылға 18 пайыздық мөлшерлемемен беріледі, оның 8 пайызы бюджет есебінен субсидияланады.
Таныстырылымда елде ауыл шаруашылығы машина жасау саласын дамыту, жергілікті өндіріс пен сервисті кеңейту басым міндет екені атап өтілді.
2026–2028 жылдары жергілікті өндірілетін техника мен агрегаттар көлемін 5 есеге арттыру, ал жергіліктендіру деңгейін қосымша 10 пайызға көтеру маңызды екені көрсетілді. Атап айтқанда, 2026 жылы өндіріс көлемін 6 мың данаға жеткізу, ал 2028 жылға қарай жергіліктендіру көрсеткішін өздігінен жүретін техникада 30–35 пайызға, аспалы және тіркемелі техникада 60–65 пайызға дейін арттыру жоспарланған.
Қазіргі таңда техника мен агрегаттарды сатып алуға берілетін субсидиялар жергіліктендіру деңгейі 25 пайыздан жоғары техникаға қолданылады. Сонымен қатар сұраныс жоғары үш түрлі импорттық техникаға да субсидия бөлу ұсынылды. Жалпы биыл техника құнының 15 пайызын жабу үшін 660 миллиард сум субсидия бағыттау көзделген.
Таныстырылымда Ташкент трактор зауыты қызметін дамыту және қолдау шаралары да қаралды.
Салада заманауи банк қызметтерін жолға қою, цифрлық технологиялар мен жасанды интеллект негізіндегі шешімдерді енгізу бағытындағы жұмыстар да ұсынылды.
2025 жылы «Агробанк» тарапынан ауыл шаруашылығы техникасына 1,6 триллион сум көлемінде несие бөлінсе, биыл бұл көрсеткішті 3,9 триллион сумға жеткізу жоспарланған. Несиелеу үдерістерін автоматтандыру нәтижесінде несие беру мерзімі 3 күннен 3 сағатқа дейін қысқарады деп күтіліп отыр.
Сонымен қатар фермерлерге кешенді агроқызметтер көрсетіледі. Әр өңірде бір агроқызмет аймағы құрылып, онда ауыл шаруашылығы агенті жұмыс істейді. Бұл аймақтарда фермерлер бір жерде банк, консалтинг, мониторинг, топырақ талдауы, көшет жеткізу, агроном кеңесі және оқу курстары туралы ақпарат ала алады.
Банк мал шаруашылығы мен бау-бақша саласында, суды «ақылды» басқаруда жасанды интеллектті қолдану бойынша пилоттық жобаларды жүзеге асыруды, сондай-ақ ауыл шаруашылығындағы стартаптарды қаржыландыру үшін жарғылық капиталы 100 миллиард сум болатын жаңа венчурлік компания құруды жоспарлап отыр.
Мемлекет басшысы ұсыныстарды мақұлдап, ауыл шаруашылығындағы механикаландыру деңгейін одан әрі арттыру, жергілікті өндіріс пен сервисті дамыту, цифрлық платформалар арқылы мониторинг пен қаржылық қызметтерді жетілдіру бойынша жауапты тұлғаларға бірқатар тапсырмалар берді.
