Кездесу басында Түркіменстан көшбасшысы Мемлекет басшысына Түркіменстан Президенті Сердар Бердімұхамедовтың сәлемі мен ізгі тілектерін жеткізді.
Өзбекстан мен Түркіменстан арасындағы достық, тату көршілік және стратегиялық серіктестік қатынастарын одан әрі дамыту және нығайту мәселелері талқыланды.
Көпқырлы ынтымақтастық барлық бағыттарда – саяси, парламентаралық, сауда-экономикалық, көлік-коммуникация және мәдени-гуманитарлық салаларда қарқынды дамып келе жатқаны атап өтілді.
Барлық деңгейлерде тиімді диалог жолға қойылған. Үкіметаралық комиссия отырыстары, Кәсіпкерлер кеңесі, Өңірлер форумы, мәдениет күндері, көрмелер және басқа да іс-шаралар тұрақты түрде өтіп жатыр. Өткен жылы екіжақты тауар айналымы 1,1 миллиард АҚШ долларын құрады. Астаналарда сауда үйлері ашылып, жүк тасымалы көлемі артып келеді. Алдағы жылдары бұл көрсеткішті 2 миллиард долларға жеткізу көзделіп отыр.
Энергетика, көлік, ауыл және су шаруашылығы, экономиканың өзге де салаларында өзара тиімді кооперация дамып келеді. «Шовот-Тошовуз» шекара маңы сауда аймағын бірлесіп құру жұмыстары қолға алынған.
Өңіраралық байланыстар жандандырылып, мәдени-гуманитарлық алмасу аясында ауқымды бағдарламалар жүзеге асырылуда.
Биыл Хиуа қаласында үшінші Өңірлер форумын және Өзбекстанда Түркіменстан мәдениеті күндерін өткізу туралы келісімге келінді.
Өзбекстан мен Түркіменстан көшбасшылары өңірлік серіктестікке қатысты мәселелер, соның ішінде «Орталық Азия плюс» форматындағы алдағы саммиттер мен Ташкент қаласында өтетін Орталық Азия мемлекеттері басшыларының жетінші Консультативтік кездесуіне дайындық барысын талқылады.
Мемлекет басшысы Түркіменстанның бастамасымен БҰҰ Бас Ассамблеясы жариялаған «Халықаралық бейбітшілік пен сенім жылы» аясында осы жылдың желтоқсан айында Ашхабадта өтетін форум мен өзге де халықаралық іс-шаралардың маңыздылығына ерекше тоқталды.
Кездесу соңында Өзбекстан Президенті Түркімен халқының ұлттық көшбасшысына оның авторлығымен жарық көрген «Тафаккур гавхари» («Ой маржаны») кітабының өзбек тіліндегі нұсқасын сыйға тартты.
