Бұл шара елдегі демографиялық үдерістерді, еңбек ресурстарын, әлеуметтік инфрақұрылымды және өңірлік дамуды ғылыми негізде жоспарлауда маңызды рөл атқарады. Санақ халықаралық стандарттарға сай, заманауи цифрлық шешімдерді пайдалану арқылы жүзеге асырылуда.
Халық санағы биылғы жылдың 15 қаңтарынан 28 ақпанына дейін екі кезеңде өткізіледі. 15–31 қаңтар аралығындағы бірінші кезеңде азаматтар арнайы ақпараттық жүйе арқылы онлайн тіркеуден өте алады. Екінші кезеңде, 4–28 ақпан күндері, «махалла жетілігі» қызметкерлері үй-үйді аралап, сауалнамаларды планшет құрылғылары арқылы толтырады.
Халық санағын өткізу census.stat.uz порталы арқылы жүзеге асырылады және OneID жүйесі арқылы сәйкестендіру көзделген. Барлық деректер геоақпараттық жүйе негізінде бақылауға алынған. Осы мақсатта республика бойынша 7,6 миллионнан астам үй шаруашылығы мен тұрғын үйдің геомекенжайлары қалыптастырылып, үдерістерді нақты уақыт режимінде қадағалауға мүмкіндік беретін арнайы мониторинг дашбордтары әзірленді.
Азаматтар ұсынатын барлық мәліметтер заңнама талаптарына сәйкес қорғалады, жеке деректер құпия сақталып, тек статистикалық мақсатта ғана пайдаланылады.
Санақ іс-шараларын жоғары деңгейде өткізу үшін 14 өңірлік және 208 аудандық және қалалық штаб құрылды. 60 мыңға жуық санақ жүргізуші қызметкер даярланды. Атап айтқанда, 54 мың «махалла жетілігі» өкілі, 2,6 мың резервтік қызметкер және 4 мың өңірлік штаб мүшесі тартылды. Сонымен қатар министрліктер мен ведомстволардан 480 тренер, жоғары оқу орындарынан 3200 волонтер оқытылды.
Халықты ақпараттандыру және түсіндіру жұмыстарына да ерекше көңіл бөлініп отыр. Соның ішінде 110 үгіт-насихат бейнеролигі, 600 телевидео дайындалды, әлеуметтік желілерде 6,3 мың, ал адам көп жиналатын орындар мен қоғамдық көліктерде 23 мыңнан астам ақпараттық материал орналастырылды.
Айтылғандай, бүгінгі күнге дейін арнайы портал арқылы 2,48 миллион үй шаруашылығы, сондай-ақ 31 мың фермерлік шаруашылық пен ауыл шаруашылығы кәсіпорны тіркелді.
Мемлекет басшысы халық пен ауыл шаруашылығын санақтан өткізу іс-шараларын сапалы ұйымдастырудың, деректердің сенімділігін қамтамасыз етудің және оларды шешім қабылдау үдерістерінде кеңінен пайдаланудың маңыздылығын атап өтті.
