Мемлекет басшысы мен Бас хатшы Тұрақты даму мақсаттарына қол жеткізу бойынша ұлттық міндеттерді орындау аясында БҰҰ мен ынтымақтастықты одан әрі кеңейту мәселелерін талқылады.
Сұхбат басында Шавкат Мирзиёев Антониу Гутерришті БҰҰ-ның мерейтойлық сессиясымен құттықтап, ұйым жүйесін заманауи шындыққа сәйкес реформалау жөніндегі бастамаларын толық қолдайтынын білдірді.
Өзбекстан мен БҰҰ серіктестігі бұрын-соңды болмаған жоғары деңгейге жеткені атап өтілді. Қазіргі таңда 160-тан астам бағдарлама мен жоба табысты жүзеге асырылуда. Қазан айында бес жылға арналған жаңа Ынтымақтастық бағдарламасына қол қойылуы күтілуде.
Кейінгі жылдары Өзбекстан бастамасымен БҰҰ Бас Ассамблеясының 13 қарары қабылданды. Сонымен қатар, ел ЭКОСОС, Адам құқықтары жөніндегі комитет, Статистика комиссиясы сияқты беделді құрылымдарға мүше болып сайланды.
Өзбекстан бастамасымен ертең БҰҰ Бас штаб-пәтерінде балалар обыры мен басқа да ауыр дерттерге қарсы күреске арналған жоғары деңгейлі форум өтеді. Сондай-ақ, Самарқанд қаласында ЮНЕСКО-ның 43-Бас конференциясына қызу дайындық жүргізілуде.
Антониу Гутерриш Өзбекстан Президентінің Бас Ассамблеяның мерейтойлық сессиясындағы сөзін жоғары бағалап, оның Тұрақты даму мақсаттарына қол жеткізу, Жаңа Орталық Азияны қалыптастыру, цифрлық технологиялар мен жасанды интеллект, жастар, ағартушылық ислам діні және басқа да салалардағы жаһандық ынтымақтастықты ілгерілетуге қатысты бастамаларының маңызын ерекше атап өтті.
Кездесу барысында өзекті халықаралық және аймақтық мәселелер жөнінде де пікір алмасылды.
Кездесу соңында басым бағыттар бойынша ауқымды серіктестікті дамыту, ынтымақтастықтың жаңа бағдарламалары мен жобаларын әзірлеу жөнінде уағдаластыққа қол жеткізілді.
