Мемлекет басшысы Олий Мажлис пен Өзбекстан халқына арнаған Жолдауында атап өткендей, биыл 8 миллион 100 мың шаршы метр көпқабатты тұрғын үй салынып, халыққа пайдалануға беріліп жатыр. Жалпы алғанда, кейінгі тоғыз жылда 210 миллион шаршы метр тұрғын үй және нысандар пайдалануға тапсырылды.
Жаңа Ташкентте де ауқымды тұрғын үй құрылысы басталған. Алғашқы кезеңде 600 мың тұрғынға арналған заманауи инфрақұрылым қалыптастыру көзделген. Жоба толық аяқталғаннан кейін Жаңа Ташкент 2 миллион адам тұратын алып мегаполиске айналады.
Халықтың тұрғын үйге деген сұранысын қамтамасыз ету жолындағы алғашқы қадам – «Шарқ бахори» тұрғын үй кешені. Бұл кешен аймақтағы ең ірі тұрғын үй жобаларының бірі саналады. 95 гектар аумақта 15 мыңға жуық пәтерден тұратын көпқабатты үйлер салынбақ.
Бүгінгі күнге дейін мұнда 18 миллион шаршы метрден астам құрылыс жұмыстары атқарылды. Құрылыста «А+» санатындағы энергия үнемдейтін заманауи материалдар қолданылып жатыр.
Кешен аумағында 15 мыңнан астам ағаш пен көшет отырғызылып, ауқымды жасыл аймақ қалыптастыру жоспарланған. Сондай-ақ автономды жылыту және салқындату жүйелері орнатылып, ғимараттардың шатырлары толықтай күн панельдерімен жабдықталады.
Тұрғындардың жеке көліктерін сақтау үшін үйлердің жерасты бөліктерінде автотұрақтар қарастырылған. Кешеннен 5–10 минуттық қашықтықта саябақ, метро станциясы, әкімшілік ғимараттар мен әлеуметтік нысандар орналасады.
Мемлекет басшысы дайын пәтерлердің бірін аралап көріп, жасалған жағдайлармен танысты. Жаңа Ташкент халық үшін барынша қолайлы тұрғын үй салуда бүкіл елге үлгі болып, тәжірибе алаңына айналуы тиіс екенін атап өтті.
