Тадбирда Коррупцияга қарши курашиш агентлиги директори А.Бурхонов, Савдо-саноат палатаси раиси А.Икромов, Ўзбекистон Республикаси Президенти ҳузуридаги Тадбиркорлик субъектларининг ҳуқуқлари ва қонуний манфаатларини ҳимоя қилиш бўйича вакил Д.Қосимов, тадбиркор З.Ҳошимов ва бошқалар сўзга чиқиб юртимизда сўнгги йилларда кичик бизнес ва хусусий тадбиркорлик мамлакатимиз иқтисодиётининг устувор йўналиши этиб белгиланганини таъкидлади. Ушбу соҳани ривожлантиришга қаратилган 2 мингга яқин қонун, фармон ва қарорлар қабул қилинди. Уларга асосан, 114 та лицензия ва рухсатнома бекор қилинди, 33 та фаолият тури хабардор қилиш тартибига ўтказилди.
Форумда БМТнинг коррупцияга қарши конвенцияси талаблари асосида ишлаб чиқилган ва тасдиқланган “Ўзбекистон бизнесининг коррупцияга қарши курашиш Хартияси” хусусида сўз юритилди. Ҳужжат вазирликлар, идоралар, ҳуқуқни муҳофаза қилиш органлари, жамоатчилик ташкилотлари мутахассислари иштирокида кенг муҳокамадан ўтказилган. Бу йўналишда дунёдаги илғор халқаро стандартлар ва бир қатор тараққий этган хорижий давлатларнинг хусусий секторда коррупцияга қарши курашиш чораларини жорий этиш борасидаги тажрибаси ўрганилди.
Хартия тадбиркорлик субъектининг молиявий фаолиятини бошқариш, шартнома муносабатлари, кадрларни танлаш ва ўқитиш, ички интизом ва қонунийликни мустаҳкамлаш, давлат харидлари каби муҳим йўналишларда коррупция хавфларининг олдини олишга қаратилган комплекс чораларни ўз ичига олган. Унда белгиланган тамойилларнинг амалиётга жорий этилиши хусусий секторда коррупциянинг олдини олиш, мамлакатнинг инвестициявий жозибадорлигини ошириш, ҳалол тадбиркорларни рағбатлантириш тизимини жорий этиш имконини беради. Коррупцияга қарши курашиш хартияси аъзолигига қўшилиш ва “Ягона реестр”ни юритиш тартиби тегишли низом билан тартибга солинади. Низомда тадбиркорлик субъектлари томонидан хартияга қўшилиш, маълумотларни электрон “Ягона реестр”да акс эттириш ва ундан чиқариш тартиби аниқ белгилаб берилди. Реестрни юритишга Савдо-саноат палатаси масъул.
Форум доирасида, шунингдек, Коррупцияга қарши курашиш агентлиги ва Савдо-саноат палатаси ўртасида ҳамкорлик битими имзоланди.
Тадбир якунида экспертларнинг фикр ва тавсиялари, тадбиркорлик субъектлари томонидан билдирилган мулоҳазалар, хусусий секторда коррупцияга қарши курашиш тизимини янада такомиллаштириш мақсадида амалий таклифлар ишлаб чиқилди.
Баҳор Хидирова,
“Янги Ўзбекистон” мухбири.
