Божхона тўловларини тўламаслик мақсадида турли найрангларни қўллаган ҳолда маиший техника товарларини юртимизга яширинча олиб киришга бўлган уринишларга қарши божхона органлари томонидан тизимли равишда кураш олиб борилмоқда.
Хусусан, Тошкент шаҳар божхона бошқармаси “Чуқурсой” ташқи иқтисодий фаолият божхона пости ходимлари томонидан пойтахтимизда фаолият олиб бораётган масъулияти чекланган жамиятлардан бирининг номига хориждан келтирилган 4 та юк контейнери ўрнатилган тартибда кўздан кечирилди.
Натижада, контейнерларда ҳужжатларда кўрсатилган газли сув иситгичлардан ташқари божхона юк декларацияси ҳамда юк кузатув ҳужжатларида қайд этилмаган, умумий қиймати 1 млрд. 569 млн. сўмлик 299 дона сув иситгичлари борлиги аниқланди.
