Ҳенлей & Партнерс консалтинг компанияси томонидан тузилган паспорт индексида Германия, Испания ва Италия давлатлари иккинчи ўринни эгаллади. 18 июл, сешанба куни эълон қилинган хабарга кўра, ушбу уч давлатнинг паспортлари 190 та штат ва ҳудудга визасиз ёки соддалаштирилган ҳолда кириш имконини беради.
Сингапур 2023 йилнинг учинчи чорагида пешқадамликни қўлга киритиб, сўнгги беш йил ичида мамлакат бу борада биринчи марта Японияни ортда қолдирди. Учинчи ўриндан еттита давлат - Австрия, Люксембург, Финляндия, Франция, Швеция, Жанубий Корея ва Япония (189 та визасиз йўналиш) жой олди.
Тузилган рейтинг натижаларига кўра, Ўзбекистон 78-ўринни эгаллаган. Республика паспортига эга бўлганлар 59 та давлатга визасиз ёки соддалаштирилган тартибда кириш имконига эгалиги қайд этилган. Рейтингда битта ўринга бирдан ортиқ давлатлар тўғри келган. Шу боис Ўзбекистондан ташқари Буркина-Фасо, Кот-дʼИвуар, Габон, Мавритания, Сан-Томе ва Принсипи, Тожикистон ҳам 78 ўринни эгаллаган.
Айтиб ўтиш лозимки, 2018 йилдан бошлаб паспорт индекси ҳар чоракда янгиланади. Мутахассислар 200 дан ортиқ мамлакат ва ҳудудлар учун виза қоидаларини таҳлил қилади. Маълум бир мамлакатнинг рейтингдаги ўрни унинг фуқаролари визани олдиндан расмийлаштирмасдан ёки келганида визасиз кириши мумкин бўлган давлатлар сони билан белгиланади.
Индекс Ҳенлей & Партнерс томонидан 2006 йилдан бери тузилади. Консалтинг ҳозирги номини 2018 йилда олган.
