Қушларнинг самолётлар билан тўқнашувини олдини олишнинг самарали усулларидан бири лочинлардан фойдаланиш бўлиб қолмоқда.
Бу учиш-қўниш йўлагида хавфсизликни таъминлашга қаратилган орнитологик назорат тизимининг бир қисмидир, дейилади «Uzbekistan Airports» хабарида.
Қайд этилишича, аэропорт ходимлари қушлар тўпланган ҳудудларни кузатиб, у ерга ўргатилган йиртқичларни жўнатади. Лочинлар табиий таҳдид сифатида ҳаракат қилиб, бошқа қушларда қўрқувни келтириб чиқаради ва уларни хавфли зонани тарк этишга мажбур қилади.
Йилнинг турли вақтларида турли хил қушлар билан ишлашга тўғри келади: ёзда кичик, қишда эса катта қушлар пайдо бўлади. Айниқса қарғалар жуда ақлли, улар товуш ёки визуал қўрқитиш воситаларига тезда мослашади. Бироқ лочинлардан доим қўрқишади — уларнинг инстинкти йиртқични эътиборсиз қолдириб бўлмаслигини айтади.
Шунинг учун бу биометод аэропорт ҳудудида орнитологик ҳодисалар хавфини камайтиришнинг энг самарали усулларидан бири бўлиб қолмоқда.
