Euronews хабарига кўра, Буюк Британияда 30 миллион киши коронавирусга қарши эмлашнинг биринчи дозасини олганига қарамай, расмийлар яқин келажакни эҳтиёткорлик билан прогноз қилишни афзал кўришмоқда.
Душанба куни Франциянинг интенсив терапия бўлимларида октябрь ойининг антирекордлари янгиланди. Кузатувчиларнинг таъкидига кўра, Президент Макрон шифокорлар, ўқитувчилар ва қўшни давлатлар расмийларининг чегараларни ёпиш тўғрисидаги даъватига қарамай, умуммиллий карантин жорий этилишига қарши туришда давом этмоқда.
Венгрияда эса коронавирус чекловлари 8 апрелга қадар узайтирилди. Мамлакатда комендантлик соати амал қилмоқда, ресторанлар, маданият муассасалари, дўконлар ва мактаблар ёпиқ қолмоқда.
Венгрия аҳолисининг 21,6 фоиздан кўпроғи камида бир доза вакцина билан эмланган. Бош вазир Виктор Орбан радиога берган интервьюсида Венгрия ташқи ишлар вазири Петер Сийяртонинг маслаҳати билан Россиянинг “Спутник V” вакцинаси сотиб олинганини айтди. У 2020 йилда Ғарб вакциналарини етказиб бериш билан боғлиқ қийин вазиятни олдиндан билган.
