"Ангрен-Поп" темир йўл линиялари олдига тоғдан тош уюмлари кўчиб тушган — ФВВ

Транспорт 15 мар 2022, 14:47 1 247

Бугун, соат 10:30ларда «Қамчиқ» Махсус қидирув, ёнғин-қутқарув бошқармасига «Ангрен – Поп» электрлаштирилган темир йўлининг 71-километри ва А-373-автомобиль йўли «Тошкент – Водий» йўналишининг 232,2-километрида йўл четига тош-тупроқ массаси тушгани бўйича хабар келиб тушган.

ФВВнинг «Қамчиқ» МҚЁҚБ қутқарувчилари ва тегишли ташкилот ходимлари зудлик билан воқеа жойига етиб бориб, вазиятни ўрганди.

Ҳозирда ҳудудларда вазият оқибатларини бартараф этиш тадбирлари олиб борилмокда.

Шунингдек, ёғингарчилик мавсумини беталофат ўтказиш мақсадида довон йўлида қўшимча яна 3 та механизациялаштирилган пост ташкил этилди, дея хабар беради ФВВ ахборот хизмати.