АҚШ ва Исроил Ғазо секторининг бўлиниши масаласини муҳокама қилмоқда, бу эса минтақани барқарорлаштириш йўлидаги ўтиш босқичи бўлиши керак. WSJ нашрида эълон қилинган маълумотларга кўра, режа ҳудудни бири Исроил, иккинчиси ҲАМАС назорати остидаги зоналарга бўлишни назарда тутади. Минтақани қайта қуриш фақат Исроил назорати остидаги ҳудудларда жангарилар бутунлай қуролсизлантирилгунга қадар ва ҳокимиятдан четлаштирилмагунча амалга оширилади.
Бу тафсилотларни АҚШ Вице-президенти Джей Ди Вэнс ва Президент Дональд Трампнинг маслаҳатчиси Жаред Кушнер Исроилдаги матбуот анжуманида маълум қилди. Вақтинчалик бўлиниш келажакда барқарорлик сари “ўтиш босқичи” деб номланади. Сиёсатчилар барча томонларни амалдаги сулҳга риоя қилишга чақирди, унга кўра Исроил аллақачон ўз қўшинларининг бир қисмини олиб чиқиб кетмоқда ва ҳозирда анклавнинг тахминан 53 фоизини назорат қилмоқда.
Венснинг таъкидлашича, бундай ҳаракатлардан мақсад Исроил хавфсизлигини таъминлаш ва ҲАМАСни босқичма-босқич қуролсизлантириш учун қулай шароитлар яратишдир. Кушнернинг қўшимча қилишича, АҚШ можаронинг ҳар икки томонида тинч аҳоли учун тинчлик ва барқарорликка эришишга қаратилган ҳар қандай чора-тадбирларни қўллаб-қувватлайди.
АҚШ Вице-президентининг тушунтиришича, унинг минтақага ташрифи сулҳнинг бажарилишини таъминлаш бўйича биргаликдаги саъй-ҳаракатларнинг бир қисмидир. У халқ манфаатларини ҳимоя қилиш ва жараёнда барча томонлар ўртасидаги ҳаракатларни мувофиқлаштириш муҳимлигини таъкидлади.
Бироқ, The New York Times газетасининг ёзишича, Трамп маъмурияти Исроил Бош вазири Биньямин Нетаньяху таклиф қилган режадан воз кечиши мумкинлигидан хавотирда. Бу Вэнc, Кушнер ва маъмурият маслаҳатчиси Уиткоффни ҳарбий ҳужумларнинг қайта тикланишининг олдини олиш учун фаол музокаралар олиб боришга ундамоқда.
Эслатиб ўтамиз, 13 октябрь куни АҚШ Президенти Дональд Трамп Ғазо секторида уруш тугаганини эълон қилган эди. Миср, Қатар ва Туркия етакчилари АҚШ Президенти Дональд Трамп билан биргаликда Ғазо секторида ўт очишни тўхтатиш бўйича келишувни имзолади. Бу Миср мезбонлик қилган халқаро саммитда юз берди.
Бироқ Ғазо секторидаги жанглар тез орада маълум муддатга қайта бошланди. 19 октябрь куни Исроил армияси ўт очишни тўхтатиш ҳақида эълон қилди, бироқ ҲАМАС ҳужумидан сўнг Ғазога кенг кўламли ҳаво ҳужумларини бошлади. Фаластинлик тиббиёт мутахассисларига кўра, камида 26 киши, жумладан, бир аёл ва бир бола ҳалок бўлди, деб хабар берди korrespondent.net.
