Мамлакатимизда бюджет маблағларини сарфланишида жамоатчилик назоратини ўрнатиш, фуқароларни бюджет жараёнига янада кенгроқ жалб қилиш мақсадида Президентимизнинг “Бюджет жараёнида фуқароларнинг фаол иштирокини таъминлаш бўйича қўшимча чора-тадбирлар тўғрисида”ги қарори қабул қилинган эди.
Мазкур ҳужжатга мувофиқ, жорий йилдан бошлаб ҳар бир ҳудудда биттадан туман ёки шаҳарда тегишли туман (шаҳар)лар бюджетлари тасдиқланган умумий харажатларининг 5 фоизини жамоатчилик фикри асосида шаклланган тадбирларни молиялаштиришга йўналтириш бўйича янги тартиб жорий этилди. Ушбу тартиб барча туман ва шаҳарларга тадбиқ этилиши режалаштирилган. Мазкур норма давлатимиз раҳбари томонидан қабул қилинган “2022-2026 йилларга мўлжалланган янги Ўзбекистоннинг тараққиёт стратегияси тўғрисида"ги фармонида ҳам ўз аксини топди.
Асака туманида Президентимиз фармонининг мазмун-моҳияти ва аҳамиятини аҳоли орасида тарғиб қилиш, унинг ижросини таъминлаш мақсадида Олий Мажлис Қонунчилик палатаси ва маҳаллий кенгаш депутатлари, вилоят Молия бошқармаси масъуллари, туман ҳоким ёрдамчилари, МФЙ раислари иштирокида ўқув семинар ташкил этилди, деб хабар беради Олий Мажлис Қонунчилик палатаси ахборот хизмати.
Семинарда Қонунчилик палатаси депутати Жаҳонгир Абдурасулов ташаббусли бюджет жараёнини амалга ошириш механизми ва унинг моҳиятини кенг ёритиш мақсадида иштирокчиларга 2022 йилда “Фуқаролар бюджети” жараёнлари икки маротаба, февраль ва июль ойларида бўлиб ўтиши, 1 февралдан бошлаб “Фуқаролар бюджети” жараёнининг жорий йилдаги биринчи босқичига “старт” берилгани, ушбу жараёнларда қандай иштирок этиш ва таклифларни (openbudget.uz) ахборот порталига жойлаштириш тартиблари хақида кенгроқ тушунчалар берди.
Шунингдек, ташаббусли бюджет тизимини ривожлантириш ва ундаги мақсадлар кўламини кенгайтириш юзасидан берилган таклифлар Олий Мажлис Қонунчилик палатаси депутати томонидан ёзиб олиниб, “Миллий тикланиш” демократик партия фракцияси муҳокамасига таклиф сифатида киритилиши маълум қилинди.
Фаол интерактив шаклда бўлиб ўтган семинарда иштирокчиларни қизиқтирган барча саволларга депутат томонидан батафсил жавоблар берилди.
