Маълум қилинишича, шаҳардаги деярли барча муассасалар ёпилади, фақат дўкон, дорихоналар ишлайди. Давлат идоралари, мактаблар ва университетлар масофадан туриб фаолият олиб боради. Икки кишидан ортиқ йиғилишларга рухсат берилмайди. Шунингдек, катта ёшли аҳоли кўчада ниқоб тақиши шарт.
Чекловлар пайтида фуқаролар ўз уйларидан фақат зарур озиқ-овқат, дори-дармон сотиб олиш, иш ва ўқиш, шифокор ҳузурига бориш, COVID — 19 га қарши эмланиш учун чиқишлари мумкин бўлади.
— Биз бир йил ичида биринчи марта касаллик юқтирган бемор билан алоқада бўлган тўққизта одамни биламиз, — деди ҳудуд бош санитария шифокори Керрин Коулман. — Улардан учтасида COVID-19 учун қилинган тест ижобий, қолганларида эса салбий натижани кўрсатмоқда.
Канберра маъмурлари пойтахтда бир неча ой ичида биринчи инфекция ҳолати учраганини Сиднейда “дельта” штаммининг тарқалиши билан боғлиқ, деб гумон қилмоқда.
— Ҳозирча биз инфекциянинг манбасини билмаймиз, лекин бир неча соатдан бери кенг кўламли текширув олиб борилмоқда. Бу аҳоли саломатлиги учун биз бу йил, айтиш мумкинки, пандемия бошланганидан бери дуч келган энг жиддий таҳдиддир — деди пойтахт раҳбари Эндрю Барр.
Aйни пайтда, Aвстралиянинг энг йирик шаҳри Сиднейда локдаун эълон қилинганига етти ҳафта бўлди. Шунингдек, ўтган ҳафта расмийлар мамлакатнинг иккинчи йирик шаҳри Мельбурнда карантин жорий этишди.
Aвстралияда пандемиянинг бутун даври мобайнида 37 мингдан ортиқ коронавирус инфекцияси ва 947 та ўлим ҳолати қайд этилган.
