Фейсбукни кузата туриб, яна бир ҳаётдан кўнгли тўлмаган бир «билағон»ни фикрларига кўзим тушди ва жим тура олмадим.
У кишининг иддао қилишларича, лўнда қилиб айтганда, Хитойдан олиб келинаётган электробусларнинг нархи жуда қиммат эмиш. Келинг у кишининг ёзган «примитив» фикрларини айнан ўзини келтирсак.
«Ҳатто гугл нималигини билмайдиган Каримов ҳам нега битта «Боинг» учоқни тўртта «Боинг» нархига олдинг деб вице-премьернинг юзига кулдон билан солган ва Арслон оғани турмада чиритган эди. Ҳозирги раҳбарнинг муборак қўлинда Ойпод¸ ойпод ичинда эса ҳар нарсани билгувчи устод Гугл қори ўтирган бўлса. Нечун бу разолат, сафолат, зироат ва исмат? Youtong электробусларининг ҳар бирини 300 минг доллардан сотиб олишди. Бу автобусларни «Алибобо» сайтидан 70 минг долларга сотиб олиш мумкин. Қолган пул қаерга кетди деб сўрарсиз? Откат. Ўзбек мулозимлари суйган сўз бу. 637 та электробус сотиб олинса, ҳар биридан 230 мингдан даромад қолса, бу 146,510,000 доллар бўлади. @eltuz алдагани ўзбек яхши.»
Агар фейсбукда фикр қолдирган инсон ҳақ бўлса, нега маълумотни аниқ манбасини келтирмаган ва холис фикр билдирмаган?! Қайсидир қуруқ танқид устига қурилган, бир бурчакда биқиниб, фақат Ўзбекистонга тош отаётган интернет сайтларидаги мутлақо асоссиз маълумотларига кўр-кўрона ишониб, шундай фикрларни ёзганлиги кўриниб турибди.
Давлат раҳбарининг барча шартномаларни ҳижжалаб кўриб ўтиришга вақти етмайди. Бу борада аниқ тизим яратилган. Яъни, давлат бюджети тўғри сарфланишига масъул бўлган мутасадди идоралар Олий Мажлис Қонунчилик палатаси олдида ҳисобдор эканлигини унутмаслик керак. Сир эмас, кейинги 5 йилда ушбу тизим фаол ишлаяпти. Давлат бюджетидан сарфланаётган ҳар бир тийин ҳисоб-китобли.
Шундай экан, фейсбукда фикр қолдирган инсонга қарата шундай деймиз: Нима бўлганда ҳам холис бўлинг. Билиб-билмай иғво тарқатманг. Марҳамат, фикрларингиз асосли, аниқ манбага эга бўлса – бутун оламга жар солмасдан, тегишли идораларга мурожаат қилинг. Ҳеч ким сизга тўсқинлик қилмайди.
Нодир ЖУМАЕВ,
иқтисод фанлари доктори, профессор
