Ўтган ҳафта давомида махсус чартер парвозлар билан Россиядан Ўзбекистонга 1100дан ортиқ фуқаролар олиб чиқилди, деб хабар қилмоқда Ўзбекистоннинг Россиядаги элчихонаси.
"14 июндан 20 июнга қадар Россия Федерациясидан Ўзбекистонга 1118 нафар фуқароларимиз олиб чиқилди", - дейилган элчихона хабарида.
Ўзбекистон фуқароларини олиб чиқиш учун Москва шаҳридан 4та парвоз, Қозондан 1та парвоз ташкил қилинган. Ватанига қайтарилиши керак бўлган фуқаролар рўйхатини тузишда биринчи навбатда кексалар, даволанишга муҳтож кишилар ва ёш болали аёлларга устуворлик берилган.
Шунингдек, элчихона "Меҳр" лойиҳаси доирасида кўрсатилган ёрдам миқдорини ҳам айтиб ўтган. Ўтган ҳафта давомида "Меҳр" лойиҳаси бўйича 3 нафар имконияти чекланган шахсларга, 118 нафар ҳомиладор аёлларга, Москвада 32 нафар ва Санкт-Петербургда 54 нафар турар жойсиз қолган фуқароларга, шунингдек 10 нафар коронавирусга чалинган Ўзбекистон фуқароларига жами 6,3 млн. рублдан ортиқ ёрдам кўрсатилган.
