Фармон давлат божхона хизмати органларига замонавий ахборот технологияларини кенг жорий этиш орқали «Интеллектуал божхона» тизимига трансформация қилиш, соҳада очиқлик ва шаффофликни таъминлаш ҳамда коррупциядан холи тизим яратишга қаратилган.

Стратегия доирасида 2030 йилга қадар инсон омилисиз амалга ошириладиган божхона расмийлаштируви даражасини 60 фоизга етказиш, божхона тушумларининг ялпи ички маҳсулотдаги улушини 4,4 фоизга ошириш ва божхона расмийлаштируви вақтини икки баробар қисқартириш белгиланган.

Шунингдек, 2026 йил 1 сентябрдан бошлаб тадбиркорлик субъектлари учун бир қатор талаблар бекор қилинди.

Жумладан, ташқи савдо шартномасини тузмасдан инвойс асосида импорт қилишда хорижий ҳамкорга олдиндан тўлов ўтказиш чеклови ҳамда экспортда олдиндан 50 фоиз тушумни таъминлаш талаби бекор қилинди.

Товарларни миллий валютада экспорт қилишда олдиндан тўловни таъминлаш ёки аккредитив, банк кафолати ва суғурта полиси каби кафолат шаклларини тақдим этиш талаби ҳам амалдан чиқарилди.

Бундан ташқари, озиқ-овқат маҳсулотларини синовдан ўтказиш учун намуна миқдори етарли бўлмаган ҳолларда санитария-эпидемиологик хулосани расмийлаштириш талаби бекор қилинди.

Божхона расмийлаштируви жараёнида айрим маҳсулотларни олиб кириш учун рухсатнома, шунингдек, дори воситалари ва тиббий жиҳозлар давлат рўйхатидан ўтказилганлиги тўғрисидаги гувоҳномани тақдим этиш талаби ҳам бекор қилинди. Уларнинг мавжудлиги мажбурий мувофиқликни баҳолаш ва санитария-эпидемиологик хулосани расмийлаштириш жараёнида назорат қилинади.

Фармонга кўра, 2026 йил 1 октябрдан солиқ органларида хавф даражаси паст бўлган ва қўшилган қиймат солиғи гувоҳномаси фаол ташқи иқтисодий фаолият иштирокчиларига импортда тўланадиган ҚҚС суммаларини ўзаро ҳисобга олиш имконияти яратилади.

Шунингдек, экспортда назорат жараёнларини рақамлаштириш ва такомиллаштириш ҳисобига божхона расмийлаштируви, фитосанитария сертификати, фумигация ҳамда товарнинг келиб чиқиш сертификати учун йиғим ва тўловлар миқдори 30 фоизга камайтирилади.