“Bloomberg” нашрида келтирилишича, Германиянинг “Daimler” компанияси президенти Ол Каллениус жорий йил охирига бориб компаниянинг юк автомобиллари ишлаб чиқарувчи бўлими концерн таркибидан ажралиб чиқанидан сўнг, “Мерседес” бренди ва товар белгисидан ким фойдаланиши мумкинлиги устида иш олиб борилмоқда.
Каллениуснинг айтишича, автоишлаб чиқарувчи концерн номини ҳозирги “Daimler”дан “Mercedes-Benz”га ўзгартиришга қарор қилган. У ушбу масала ниҳоятда муҳим эканини, “Mercedes” дунёдаги энг нуфузли саккизта брендлардан бири ҳисобланишини, ўз соҳасида у фақатгина “Toyota”дан ортда қолаётганини таъкидлаган.
Қайд этиш керак, “Daimler” бренди илк марта 1902 йилда 35 от кучига эга бўлган “Mercedes” автомобили Ниццадаги пойгада ғалаба қозонганидан сўнг патентланган эди. Автомобиль тадбиркор Эмил Йеллинек томонидан буюртма қилиниб, унинг қизи шарафига Мерседес деб номланган. 1910 йилдан бошлаб эса уч қиррали юлдуз “Mercedes” машиналарининг ажралмас қисмига айланган. Уни Готтлиб Даймлер ўйлаб топган.
