Ниқоб кийиш барча ёпиқ жамоат жойларида, шу жумладан поезд станциялари ва аэропортлар, банклар ва почта бўлимлари, дўконлар ва ибодатхоналарда мажбурий ҳисобланади. Қоидабузарларга 135 евро жарима солинади.
Euronews хабарига кўра, президент Эмманюел Макрон 14 июль, Бастилия куни муносабати билан берган интервьюсида мамлакатда коронавируснинг қайтиши белгилари борлиги, аммо расмийлар бунга тайёр эканлигини айтди.
Сўнгги кунларда COVID-19 аломатлари бўлган беморлар томонидан тез ёрдамга қилинган қўнғироқларнинг сони кескин ошиб кетди. Сўнгги бир ҳафта давомида 600 нафардан ортиқ киши касалхонага ётқизилди, уларнинг 70 нафари ҳозир реанимацияда. Сўнгги бир кун ичида 14 нафар инсон юқумли касалликдан вафот этди.
Мамлакат бўйлаб ушбу касалликнинг янги ўчоқлари аниқланди. Тўртта ҳудудда вазият айниқса ташвишга солмоқда: Франция Гвианаси, Маёта, Маен ва Жиронда.
Реюнион, Бретан ва Прованс-Алп-Лазур қирғоқларида ҳар бир касалланган одам яна қанча одамга юқтирганини ўлчайдиган Коронавирус кўпайиш индекси сезиларли даражада ўсди.
