Бухоро вилояти “Хўжадавлат” темир йўл чегара божхона пости орқали республикамиз ҳудудидан транзит тарзида ҳаракатланаётган юк поезди вагонларидан бирининг инспекцион кўрик мажмуасидан олинган рентген тасвири ҳамда контейнер эшиги, ички қисмидаги белги ва рақамлар акс этган ёрлиқлар қўлбола усулда ўзгартириб қўйилгани божхона ходимларининг диққатини тортди.
Ҳужжатларга кўра, мазкур контейнерга 20 тоннадан зиёд оғирликдаги, муқаддам фойдаланилган авто эҳтиёт қисмлари ортилган бўлиши лозим эди. Аммо, тасвирларда вагонга бошқа турдаги товарлар ортилгани аниқланганлиги сабабли, контейнер юк эгалари иштирокида кўрикдан ўтказишга қарор қилинади.
Бироқ қўшни давлатдан на юк эгалари, на уларнинг ишончли вакиллари бир неча кун давомида қайта-қайта чақарилсалар-да, кўрик жараёнига етиб келмаганларидан сўнг, контейнер амалдаги тартиблар асосида ва холислар иштирокида очилди.
Натижада контейнерда юк кузатув ҳужжатларида кўрсатилмаган, умумий қиймати 10 млрд. 610 млн. сўмлик 700 минг 719 қути сигаретлар ортилгани маълум бўлди.
Ҳозирда юқоридаги ҳолат юзасидан божхона органлари томонидан жиноят иши қўзғатилди.
