Тиббиёт муассасаларида ҳар ўнинчи ўринни коронавирус билан касалланганлар эгаллайди, деб хабар беради Euronews
телеканали.
Икки ҳафта ичида шифохоналар одам билан тўлади, дейди Британия Вазирлар Маҳкамаси ҳузуридаги Фавқулодда илмий маслаҳат гуруҳи мутахассислари. Натижада, Миллий соғлиқни сақлаш хизматининг минтақавий бўлими бўлган 20 дан ортиқ касалхоналар режалаштирилган беморларни касалхонага ётқизишни тўхтатади.
Сўнгги маълумотларга кўра, мамлакатда жарроҳлик амалиётини кутаётган 3,6 миллиондан ортиқ киши бор. Institute for Governmentнинг айтишича, ҳукумат яқин келажакда пандемияга қарши курашиш учун қўшимча маблағ ажратмаса, кутиш рўйхатлари янада узаяди.
Буюк Британияда кунига 20 минг нафардан ортиқ одамда коронавирус касаллиги қайд этилди. Инфекция юқтирган одамларнинг умумий сони миллион нафардан ошди. Ҳаммаси бўлиб 46,7 минг нафар одам вафот этди. Бу Европадаги энг юқори кўрсаткичдир.
5-ноябрдан 2-декабргача Буюк Британияда бутун мамлакат бўйлаб карантин жорий этилади. Хусусан, Англияда барлар ва ресторанлар, сартарошхона ва кинотеатрлар ёпилади. Таътилда чет элга чиқиш ёки уни уйдан ташқарида ўтказиш имконсиз бўлади. Фақат битта одам билан кўчада учрашишга рухсат берилади.
