Ўзбекистон Инвестициялар, саноат ва савдо вазирлиги (ИССВ) маълумотига кўра, унда икки давлат ҳукумат раҳбарлари Абдулла Арипов ҳамда 29 апрель куни Ўзбекистонга расмий ташриф билан келган Андрей Бабиш иштирок этди.
Мазкур анжуман 200 дан ортиқ делегатларни бирлаштириб, икки томонлама алоқаларнинг жадал ривожланиб бораётганини яна бир бор тасдиқлади, зеро охирги саккиз йил ичида ўзаро товар айирбошлаш ҳажми икки баробар ортди. Бугунги кунда республикамизда Чехия сармояси иштирокидаги 37 та корхона муваффақиятли фаолият юритиб, ҳамкорликнинг мустаҳкам пойдеворини ташкил этмоқда.
Мулоқот давомида Ўзбекистоннинг инвестициявий ютуқларига алоҳида тўхталиб ўтилди, хусусан, 2025 йилда мамлакат ялпи ички маҳсулоти 145 миллиард доллардан ошди. Чехия компаниялари саноат ва транспорт соҳаларига инновацияларни жорий этишга тайёр эканликларини билдириб, Ўзбекистонни Марказий Осиё бозорига чиқиш учун стратегик марказ сифатида эътироф этдилар.
Учрашув якунида машинасозлик, инфратузилмани модернизация қилиш ва таълим йўналишларида ҳамкорлик бўйича ҳужжатлар имзоланди. Чехия экспорт банки ҳамда EGAP корпорацияси билан эришилган келишув муҳим молиявий восита бўлиб хизмат қилади. Ушбу механизм қўшма юқори технологияли ишлаб чиқариш лойиҳалари учун имтиёзли кредитлаш ва рискларни суғурталашни таъминлайди.
Форум йирик компаниялар ва банклар иштирокидаги G2B ҳамда B2B музокаралар билан якунланди. Унда томонлар истиқболли лойиҳаларни амалга ошириш бўйича аниқ чора-тадбирларни белгилаб олдилар.
