Давлат активларини бошқариш агентлиги тизимида коррупцияга қарши курашиш билан боғлиқ бўлган таркибий тузилма жорий этилган бўлиб, ушбу фаолиятни такомиллаштириш учун муҳим чора-тадбирлар амалга оширилмоқда. Ўтган давр мобайнида Агентликда коррупцияга қарши курашиш бўйича ISO 37001 халқаро стандарти жорий қилиниб, "Коррупцияга қарши бошқарув тизими" сертификати қўлга киритилди. ISO 37001 бу ташкилотда коррупцияга қарши самарали тизимни яратиш учун халқаро моделни ўз ичига олган дунёдаги биринчи халқаро стандарт ҳисобланади. Ушбу стандартнинг сертификатини олиш орқали ташкилот инвесторлар, тадбиркорлар, давлат ҳокимияти органлари ҳамда бошқа манфаатдор томонларга бизнес жараёнларини шаффоф, қонуний ва жаҳоннинг илғор тажрибаларига мувофиқ равишда ўтказиш қобилиятини юқори даражада намойиш этиши мумкин.
Агентликда мазкур стандартнинг талабларини тадбиқ этиш доирасида тизимда яширин иқтисодиёт ва коррупцияга қарши курашиш ҳамда унинг олдини олиш бўйича “Йўл харитаси” тасдиқланиб, шу асосда бир қатор ҳужжатлар қабул қилинди.
Ахборот хавфсизлиги сиёсатини таъминлаш мақсадида ходимлар билан тузилган меҳнат шартномаларида коррупцияга қарши курашиш ва унинг олдини олиш бўйича мажбуриятлар ўз аксини топди. Бўш иш ўринларига ходимларни қабул қилишда шаффофликни таъминлаш, уларни танлаш ва жой-жойига қўйиш, ротация қилиш, рағбатлантириш тизими жорий этилди. Бундан ташқари, Агентликда коррупция тўғрисида хабар бериш янги алоқа каналлари жорий этилди.
Агентликнинг барча ҳудудий бошқармалари ва идоравий мансуб ташкилотларида ички назорат ва комплаенс хизмати бўлинмалари ташкил этилди. Шунингдек, Агентликнинг хусусийлаштириш, корпоратив бошқариш, баҳолаш, банкротлик, давлат мулкини ижарага бериш соҳасидаги фаолиятининг очиқлиги ва шаффофлигини таъминлаш, инсон омилини қисқартириш бўйча ишларни амалга ошириш мақсадида замонавий IT технологияларини янада такомиллаштириш ва инсон омили юқори бўлган йўналишларни рақамлаштириш бўйича “Йўл харита”си қабул қилиниб амалга тадбиқ этиляпти.
Бундан ташқари, Президентимизнинг “Коррупцияга қарши курашиш ишларининг самарадорлигини рейтинг баҳолаш тизимини жорий этиш чора-тадбирлари тўғрисида”ги қарори билан давлат ташкилотларида коррупцияга қарши курашиш ишларининг самарадорлигини рейтинг баҳолаш тизими жорий этилган. Давактив агентлигининг коррупцияга қарши курашиш ва уни олдини олиш бўйича иш фаолияти самарадорлиги рейтинги Коррупцияга қарши курашиш агентлиги томонидан “қониқарли” натижа билан баҳоланди.
