Мазкур қонун лойиҳаси билан айрим қонунлардаги “доимий прописка қилиш” ва “турган жойи бўйича ҳисобга олиш” тушунчаларини “доимий яшаш жойи бўйича рўйхатга олиш” ва “вақтинча турган жойи бўйича рўйхатга олиш” тушунчаларига алмаштириш, бир қатор қонунларда биометрик паспортга оид ишлатилаётган тушунчалар келгусида идентификацияловчи ID-карта билан қўлланилиши сабабли ушбу қонунларга идентификацияловчи ID-карта тушунчаси киритилиши назарда тутилган.
Ўзбекистон Республикасининг фуқаролигига мансуб эмаслик тўғрисидаги маълумотномани расмийлаштирганлик учун давлат божи миқдорини белгилаш, фуқаро идентификацияловчи ID-картани олиш ёки алмаштириш юзасидан ўз вақтида мурожаат қилмаганида, яроқсиз ҳолга келтирганда ёки йўқотиб қўйган тақдирда, маъмурий жавобгарликка тортиш масаласида юзага келган ҳуқуқий бўшлиқ бартараф этилмоқда.
Депутатларнинг фикрича, қонун лойиҳасининг қабул қилиниши ҳуқуқни қўллаш амалиётида “доимий яшаш жойи бўйича рўйхатга олиш”, “вақтинча турган жойи бўйича рўйхатга олиш” ҳамда идентификацияловчи ID-карта тушунчалари билан боғлиқ бўшлиқларнинг бартараф этилишига хизмат қилади.
Халқ вакиллари қонун лойиҳаси юзасидан ўз фикр-мулоҳазаларини билдирдилар. Билдирилган таклиф ва мулоҳазалардан келиб чиқиб, қонун лойиҳаси иккинчи ўқишда қабул қилинди.
Шунингдек, мажлисда Ўзбекистон Республикасининг Уй-жой кодексига қўшимча ва ўзгартиш киритиш тўғрисида”ги қонун лойиҳаси иккинчи ўқишда муҳокама қилинди.
Уй-жой кодексининг 27-моддасига биноан, ер участкалари давлат ёки жамият эҳтиёжлари учун олиб қўйилиши муносабати билан фуқаролар мулкида бўлган уйлар (квартиралар) бузилган тақдирда, мулкдорларга уларнинг танлови бўйича ва тарафлар келишувига кўра, уй-жой майдонининг ижтимоий нормасидан кам бўлмаган саҳндаги, барча қулайликлари бўлган, аввалгисига тенг қийматли бошқа турар жой мулк қилиб берилади.
Мазкур қонун лойиҳасининг қабул қилиниши жамоат эҳтиёжлари учун компенсация эвазига ер участкаларини олиб қўйиш масалалари тўғридан-тўғри амал қиладиган қонун ҳужжатлари билан тартибга солиниши, низоли вазиятларни олдини олиниши ва ушбу соҳадаги низоларни самарали ҳал этиш, ер участкалари эгаларининг ҳуқуқлари ва қонуний манфаатлари ҳимоясини кучайтиришга хизмат қилади.
Мажлисда қонун лойиҳаси депутатлар томонидан иккинчи ўқишда қабул қилинди.
Парламент қуйи палатаси мажлиси давом этмоқда.
ЎзА
