Хусусан, туманнинг Қўнғирот маҳалласида жойлашган лалми ҳудудда «Исмоилов Ҳасан» хусусий корхонаси томонидан 17 гектар ер майдонида томчилатиб суғориш тизимига асосланган намунавий бодомзор ташкил этилди. Лойиҳа доирасида 12 мингдан ортиқ бодом кўчатлари замонавий агротехнологиялар асосида экиб чиқилди.

Тадбиркор Бобошер Тошбоевнинг маълум қилишича, 2025 йил февраль ойида экилган кўчатларнинг деярли барчаси яхши тутиб, барқарор ўсиш жараёнига кирган. Бу эса лойиҳанинг тўғри ёндашув ва сифатли агротехник тадбирлар асосида амалга оширилаётганини кўрсатади.

Эътиборли жиҳати шундаки, лалми шароитга қарамасдан, ҳар бир кўчат остига томчилатиб суғориш тизими билан бирга махсус пластик идишлар ўрнатилган. Мазкур усул орқали намликнинг тўғридан-тўғри илдиз қисмига етиб бориши таъминланмоқда.

Шунингдек, келгусида ер майдонидан самарали фойдаланиш мақсадида бодом қаторлари орасига каврак экиш режалаштирилган.