Туркия Президенти Режеп Таййип Эрдоған Европа давлатлари Киевни қўллаб-қувватласа-да, Россиянинг Украинага қарши уруши тез орада тугашига ишонмайди. “Мен бунга ҳақиқатан ҳам ишонмайман. Ва бу бутун дунё учун яхши эмас. Бу ёмон янгилик ва бу ҳақда шундай фикр юритиш биз учун қийин”, деди у 23 сентябрь, сешанбага ўтар кечаси Американинг Fox News телеканали эфирида.
Эрдоғон Украинани қўллаб-қувватлаш давом этишига умид қилмоқда.
Унинг тушунтиришича, Украина Россия билан иқтисодий жиҳатдан рақобатлаша олмайди, Европа эса Киевга чексиз муддатга иқтисодий ёрдам бера олмайди. “Умид қиламизки, бу қўллаб-қувватлаш давом этади”, деди Туркия раҳбари ва АҚШнинг Украинани қанча вақт қўллаб-қувватлашини тахмин қила олмаслигини айтди.
Россиянинг Европа Иттифоқи ҳаво ҳудудидаги провокацияларига НАТОнинг эҳтимолий жавоби ҳақидаги саволга жавоб берар экан, Эрдоған иттифоқни Россия Президенти Владимир Путин ва Украина Президенти Владимир Зеленский билан яхши муносабатда бўлган Туркияга ўхшаш моделга амал қилишга чақирди. Унинг фикрича, НАТО кескинликни камайтириш учун ҳар икки томон билан дипломатик ҳамкорлик тамойилларига амал қилиши керак.
“Россия жуда жиддий йўқотишларга учради. Украина ҳам инсоний ва молиявий жиҳатдан жуда жиддий йўқотишларга учради. Биз бундай бўлишини хоҳламагандик”, дея қўшимча қилди Туркия раҳбари.
Россиянинг Украинага кенг кўламли босқини бошланганидан бери Туркияда Россия ва Украина делегациялари ўртасида бир неча марта музокаралар ўтказилди. Туркия Президенти, шунингдек, Зеленский ва Путин ўртасида шахсий учрашув ўтказилиши тарафдори, деб хабар берди dw.com.
