Иброгим Қурбонов 1949 йилда Хоразм вилояти Хазорасп туманидаги Мутбури қишлоғида туғилган. 1966 йилда ўрта мактабни тамомлаб, 1968 йилда Тошкент қишлоқ хўжалик институтининг ипакчилик факультетига ўқишга кириб, 1973 йилда диплом ишини аъло баҳога ҳимоя қилиб, 1975 йилда танлов асосида аспиратурага қабул қилинади. Аспирантлик чоғида И.Қурбонов “Хоразм вилояти шароитида халқаланган қаламчадан бута тутзор ташкил қилиш” мавзусидаги илмий тадқиқот ишини муваффақиятли олиб борди. Шунингдек, у вилоятнинг туманларида навдор тут кўчатларини етиштириш бўйича мунтазам илмий тадқиқотлар олиб бориб, вегетатив йўл билан кўчат етиштиришга катта ҳисса қўшди.
Қаҳрамонимиз 1967-69 йилларда Хазорасп туманидаги Фрунзе жамоа хўжалигида агроном, 1969-70 йилларда туман мудофаа бўлимида, 1970-72 йилларда жамоа хўжалигида клуб мудири, 1972-74 йилларда туман пиллачилик корхонасида, 1978-84 йилларда жамоа хўжалигида касаба уюшмаси раиси, мактаблараро ўқув ишлаб чиқариш комбинатида қишлоқ хўжалиги асослари фани ўқитувчиси ва шу комбинатда директор ўринбосари, директор лавозимларида фаолият юритди.
2019 йилда “Хоразм вилояти шароитида тут қаламчасидан навдор тут кўчатларини етиштириш ва бута тутзорлар яратишнинг илмий асослари” мавзудаги илмий иши билан “”Ипакчилик ва тутчилик” кафедрасига мустақил изланувчиликка қабул қилинди.
2020 йилда Ипакчилик илмий текшириш институтининг ўқув тажриба майдонида тут кўчатларининг навдор ва ҳосилдор навларидан қаламчалар олиб, искана пайванд ишларини ўтказди. Шунингдек, Тошкент давлат аграр университетига қарашли тажриба хўжалигида 0,50 га майдонга туманлаштирилган тут навлари коллекциясининг навдор кўчатларини экишда ва интенсив турдаги бута тутзор ташкил қилишда фаол иштирок этди. Бундан ташқари, университетнинг экспериментал тажриба хўжалигида тут кўчатларининг 250 тупини навдор тут навлари – Жарариқ-7, Жарариқ-10, Мустақиллик ва Марҳамат-17 навларидан қаламча олиб, пайвандтагга куртак пайванд ва найча пайванд ишларини амалга оширди.
Иброгим Қурбоновнинг “Ипакчилик ва тутчилик” ихтисослиги бўйича фалсафа доктори илмий даражасини олиш учун тақдим этган диссертацияси университет Илмий Кенгаши томонидан тасдиқланиб, унга қишлоқ хўжалиги фанлари бўйича фалсафа фанлари доктори илмий даражаси берилди. Унга 2020 йилнинг 30 ноябрь куни тантанали равишда докторлик дипломи топширилди.
— Иброгим Қурбонов кекса бўлишига қарамай, мамлакатимизнинг иқтисодий ва ижтимоий салоҳияти ҳамда пиллачилик соҳасининг юксалишига муносиб ҳисса қўшаётганидан фахрланаман, — дейди Тошкент давлат аграр университети ректори, академик Б.А.Сулаймонов. Шу билан бирга ўндан ортиқ олимлар нуронийнинг илмий изланишларига юқори баҳо бердилар.
Бугун матбурилик каттаю кичик 70 ёшдан Иброгим Қурбоновнинг докторлик даражасини олганидан чексиз фахрда. Қишлоғимиз фахри бўлган бу фидойи инсонга узоқ умр, сиҳат-саломатлик тилаймиз.
