Қозоғистоннинг “Тобол” клуби ва Ўзбекистон миллий термаси ҳужумчиси Игорь Сергеев Москванинг “Торпедо” клубига ўтиши мумкин. Бу ҳақда sports.kz хабар тарқатди.
“Москва клуби ҳужум чизиғини Игорь Сергеев билан кучайтириш масаласини кўриб чиқмоқда”, дейилади хабарда.
“Тобол” клуби матбуот хизмати бунга муносабат билдирар экан, Игорь Сергеевнинг амалда шартномаси борлигини эслатган.
“Айни дамда Игорь Сергеев “Тобол” футболчиси. Унинг жамоамиз билан амалда шартномаси бор. Эҳтимол, “Торпедо” ҳужумчининг ўзи билан алоқага чиққандир”, деган клуб вакили Россиянинг Sport24 сайти мухбирига.
Ҳақиқатан ҳам, 29 ёшли ҳужумчининг қозоқ клуби билан амалдаги келишуви 2022 йил якунига қадар белгиланган. Шундан кейингина у эркин агент сифатида жамосини ўзгартиши мумкин.
Трансфер амалга ошса, Игорь яна бир футболчимиз Ҳожимат Эркиновнинг жамоадошига айланади.
И. Сергеев жорий мавсум Қозоғистон чемпионатида 16 ўйинда 6та гол киритди.
