Иштихон туман ҳокими Шуҳрат Негматов ёшлар билан учрашиб, уларни қизиқтирган масалалар, қийнаётган муаммоларни ўрганди. Туман ёшлари тадбиркорликка иштиёқи баландлиги, ҳунармандчиликка қизиқиши билан ажралиб туради. Учрашувда, биргина “Каттақанғли” маҳалласидан 22 та фуқаро қатнашиб, ёшларининг 35 та мурожаати бўйича 33 та масаласи қаноатлантирилди.
Жумладан, М.Зокировага уч нафар шогирд тайёрлаш эвазига учта тикиш машинаси, А.Тўйчиевага аёллар сартарошхонаси ва тикувчилик фаолиятини бошлаш учун 30 миллион сўм кредит маблағи ажратилди. Э.Давировга бепул “сварка” аппарати ва 30 миллион сўм имтиёзли, Ғ.Абдуҳакимовга 100 миллион сўм тижорат кредити берилди. Шунингдек, М.Исломовга маҳалла биноси ёнидан енгил конструкцияли кўчма “пайнет” дўкони қўришга рухсат берилди. Бундан ташқари, нонвойхона очиш истагида бўлган ёш тадбиркорга ҳомий томонидан моддий кўмак берилди. Ва ҳакозалар... Бу ҳокимининг биргина учрашувда, бир маҳалла мисолида ҳал этилган масалаларнинг бир қисмигина холос. Аслида, рўйхатни узоқ давом эттириш мумкин.
Таъкидлаш жоизки, ушбу учрашувни ташкил этишдан мақсад, Президентимиз олиб бораётган оқилона сиёсатини тадбиқ этишда оғишмай ёндашиш, ёшларнинг узоқ йиллар орзу қилган ғояларини амалга оширишда уларга елкадош бўлиш, шу орқали даромад топиш, оилаларда тўкинчилик бўлиши, яхши яшаши учун шароит яратиб беришдир.
