Таъкидланганидек, Жаҳон банкининг “Аёллар, бизнес ва қонун” индекси Ўзбекистон Республикаси учун устувор бўлган халқаро рейтинг ва индекслар рўйхатига киритилган бўлиб, Индексда Ўзбекистон Республикасининг ўрнини яхшилаш учун Оила ва хотин-қизлар давлат қўмитаси ҳамда Бандлик ва меҳнат муносабатлари вазирлиги (ҳозирги кунда Камбағалликни қисқартириш ва бандлик вазирлиги ҳамда унинг ҳузуридаги Оила ва хотин-қизлар қўмитаси) масъул этиб белгиланган.
Индекснинг 2021 йил натижаларига кўра, мамлакатимиз илк бор хотин-қизлар ҳуқуқлари ва гендер тенглик бўйича аҳамиятга молик ислоҳотларни амалга оширган 27 та давлат қаторига киритилган ҳамда 70,6 балл билан 5 поғонага юқорилаб, 190 та давлат орасидан 134-ўринни (2019 йилда 139-ўрин) эгаллаган. Бироқ сўнгги икки йилда ушбу кўрсаткич ўзгаришсиз қолган.
Индексда Ўзбекистоннинг позициясини яхшилаш бўйича амалга оширилаётган ишлар юзасидан Камбағалликни қисқартириш ва бандлик вазирлиги ҳамда унинг ҳузуридаги Оила ва хотин-қизлар қўмитасининг ахборотлари эшитилди.
Ўзбекистон учун устувор халқаро рейтинглар бўйича самарадорликнинг энг муҳим кўрсаткичларига (KPI) кўра Индексда мамлакатимиз 2021 йилда 73,7 балл ва 2022 йилда 88,1 балл тўплаши белгиланганлиги, бироқ ушбу кўрсаткичларга эришилмаганлиги қайд этилди.
Мажлис давомида Индекс доирасида мунтазам паст баҳоланиб келинаётган таркибий индикаторларида мамлакатимиз кўрсаткичларини яхшилаш мақсадида чора-тадбирлар белгилаб олинди.
Хусусан, Индекс билан ишлашда халқаро ҳамкорликни ривожлантириш, шу жумладан ҳисоботни тузишда иштирок этувчи халқаро ташкилотлар ҳамда маҳаллий экспертлар билан мулоқот қилиш, шунингдек, миллий қонунчиликни такомиллаштириш каби йўналишларда чора-тадбирлар тасдиқланди.
Муҳокамалардан сўнг мазкур масала юзасидан Сенат Кенгашининг тегишли қарори қабул қилинди, деб хабар беради Олий Мажлис Сенати матбуот хизмати.
