Суҳбат аввалида мамлакатимиз элчиси Америка томонига Ўзбекистонда амалга оширилаётган ижтимоий-иқтисодий ислоҳотлар, шаҳарсозлик соҳасида эришилаётган муваффақиятлар, ҳудудлараро ҳамкорликни ривожлантириш борасидаги саъй-ҳаракатлар ҳақидаги батафсил маълумотларни тақдим этди.
Калифорния шаҳарлари мэрларининг алоҳида эътибори АҚШ ҳудудларининг Ўзбекистон билан шериклик алоқаларини мустаҳкамлашга, шунингдек, Америка инвесторларининг мамлакатимиз бозорида тадбиркорлик фаоллигини оширишга қаратилди.
Учрашувда Калифорния штатининг Манҳеттен-Бич мэри Ричард Монтгомери икки давлатнинг минтақавий даражадаги шериклик алоқалари тобора кенгайиб бораётганидан мамнуният билдирар экан, ҳамкорликнинг бундай шакли АҚШ ва Ўзбекистон шаҳарларини ривожлантириш бўйича илғор тажрибаларни янада самарали ўрганиш имконини беришини таъкидлади.
Шунинг муносабати билан, шаҳар мэри кинематография соҳасидаги Ўзбекистон компаниялари ва ўз шаҳридаги шу каби фирмалар билан, хусусан, «Manhattan Beach Studios» (видео ишлаб чиқариш хизмати) ўртасида ҳамкорлик алоқаларини ўрнатишга кўмаклашишга тайёр эканлигини маълум қилди.
Калифорния штатининг Эл-Сегундо шаҳари мэри Дрю Бойлснинг айтишича, у бошқараётган шаҳарда «Fortune 500» рўйхатидаги ўнлаб компанияларининг офислари жойлашган бўлиб, шаҳар дунёнинг аэрокосмик пойтахти сифатида тан олингани, шунингдек, биофан, ахборот технологиялари, энергетика каби фирмаларни ўз ичига олганини айтди.
Суҳбат чоғида Америка томонидан Ўзбекистон компаниялари билан электромобиллар ишлаб чиқариш, космик ва бошқа соҳаларда ҳамкорлик алоқаларини ўрнатишда кўмаклашишга ҳозирлик билдирилди.
«Мен мамлакатингиз автомобиль саноати ва унинг бу борадаги салоҳияти, шунингдек, Ўзбекистон расмийларининг мамлакатда экологик тоза транспортни жорий этиш борасидаги саъй-ҳаракатлари билан танишман, шу боис Ўзбекистон ҳукумати билан бу йўналишда ҳамкорлик қилишни истар эдим», деди Дрю Бойлс.
Учрашув якунида АҚШнинг Калифорния штати шаҳарлари мэрлари билан саноатнинг турли соҳаларида ўзаро алоқаларни давом эттириш, икки давлат вакилларининг бир қатор онлайн музокаралари ва ташрифларини ташкил этишга келишиб олинди.
