Корея-Ўзбекистон бизнес ассоциацияси раиси биринчи ўринбосари Ким Чанг Кеон билан бўлиб ўтган мулоқотда сўнгги йилларда икки давлат ўртасида иқтисодий алмашинув ва сармоявий фаолият ривожланиб бораётгани, ҳамкорлик янги поғонага кўтарилгани алоҳида қайд этилди.
Сармоявий ҳамкорликни мустаҳкамлаш, Корея Республикасининг етакчи компанияларини Ўзбекистонга жалб этиш масалалари муҳокама этилди.
Музокаралар натижасида Ўзбекистон маҳсулотларини Корея Республикасига экспорт қилишга хизмат қиладиган Ўзбекистон-Корея қўшма транспорт-логистика компанияларини ташкил этиш, аудио ва видео техника, шунингдек, видеокузатув тизимлари ишлаб чиқариш ҳамда чиқинди полигонлари негизида қаттиқ маиший чиқиндиларни қайта ишлаш мажмуасини яратиш каби лойиҳаларни кўриб чиқиш ва уларни тайёрлаш бўйича келишувга эришилди.
Корея халқаро ҳамкорлик агентлиги (KOICA) президенти Чанг Вон Сам билан ўтказилган учрашувда биргаликда амалга оширилаётган лойиҳалар, икки томонлама муносабатларни кенгайтиришга қаратилган янги имкониятлар муҳокама этилди.
Маълумот ўрнида айтиш жоиз, Ўзбекистон KOICA нинг дунё бўйлаб бешта йирик ҳамкорларидан бири бўлиб, минтақадаги стратегик муҳим ҳамкор ҳисобланади.
Айни пайтда мазкур агентлик томонидан Ўзбекистонда ижтимоий-иқтисодий дастурларни амалга оширишда 140 миллион доллардан ортиқ молиявий, техник ва грант ёрдами кўрсатилган.
Олий Мажлисда “электрон парламент” тизимини жорий этиш лойиҳасини амалга оширишда KOICA билан ҳамкорлик фаол ривожланиб боряпти.
Глобал Яшил ўсиш институти (GGGI) томонидан KOICA билан биргаликда Орол денгизи минтақаси экотизимини яхшилаш бўйича амалга оширилаётган умумий қиймати 5,9 миллион доллар бўлган лойиҳа амалга ошириляпти. Шу маънода Кореянинг илғор тажрибаси ва экологик муаммоларни ҳал этишдаги амалий муваффақиятларини инобатга олган ҳолда, иқлим ўзгариши жараёнларини жиловлаш ва “яшил” технологиялар бўйича ҳамкорликни янада кенгайтириш юзасидан фикр алмашилди.
Сўнгги йилларда Ўзбекистон жуда тез суръатлар билан ривожланаётгани ва турли лойиҳаларни амалга ошириш зарурати юзага келаётгани алоҳида таъкидланиб, соғлиқни сақлаш, таълим, ахборот технологиялари, коммунал хўжалик, қишлоқ ва сув хўжалиги, энергетика, транспорт ва бошқа соҳалардаги лойиҳаларни илгари суриш орқали кенг қамровли ва кўп томонлама ҳамкорликни янада ривожлантиришга келишиб олинди, деб хабар беради Олий Мажлис Сенати матбуот хизмати.
