Бундай маълумотларни Манчестер университети аудиологлари ўзларининг тадқиқотидан сўнг American Journal of Otolaryngology нашрида эълон қилганлар.
Шифокорлар Уайтеншоу клиникасида коронавирусдан даволанган 121 нафар беморни кузатганлар. 16 нафар бемор шифохонадан соғайиб чиққанидан икки ой ўтиб, қулоғи ёмон эшита бошлагани ҳақида шикоят қилганлар, деб хабар беради Российская газета.
— Саккиз беморимиз ёмон эшитаётгани ҳақида, яна саккиз нафари эса қулоғида шовқин пайдо бўлгани ҳақида хабар берганлар, — деб таъкидлади тадқиқотнинг етакчи муаллифи профессор Кевин Манро.
Олимнинг сўзларига қараганда, янги коронавирус инфекциясининг инсон эшитиш тизимига таъсири олдиндан тахмин қилинганди, чунки қизамиқ, эпидемик паротит, менингит каби вируслар ҳам айнан ушбу соҳада муаммо келтириб чиқариши мумкин эди.
Манронинг таъкидлашича, эҳтимол, гап эшитиш невропатияси ҳақида кетяпти. Бундай ҳолда эшитиш нерви орқали сигналларнинг мияга ўтказилиши бузилади.
COVID-19нинг бундай асоратлари ҳақида шикоят қилган беморларнинг ўртача ёши 64ни ташкил этади. Улардан баъзиларининг эшитиш тизимидаги муаммолар аввалдан бошланган ва касал юқтиргандан кейин кучайган, кўпчилигининг эса илгари бундай муаммолари бўлмаган.
Тадқиқотчининг сўзларига қараганда, янги коронавируснинг эшитиш тизимига таъсири ҳақида ҳали хулоса қилишга эрта. Чунки бир қатор омиллар мавжудки, эшитиш тизимини ишдан чиқарадиган. Бу — стресс, патогенга қарши қўлланиладиган дори воситалари таъсири, ҳатто юзга тақиладиган ниқоб ҳам бўлиши мумкин. Лекин шунга қарамай, COVID-19нинг инсон сезги органларининг бирига узоқ йиллар асорат қолдирувчи таъсир ўтказиши ҳақида далиллар бор.
