Учрашув чоғида Президентимиз биздан “Нима таклифларинг, тилакларинг бор?” деб сўради. Кўпчилигимиз республика ва халқаро миқёсдаги мусобақаларда қатнашиб, чемпион бўлганимизни айтдик. Шунда у киши “Бугун қарор қабул қиламан, сизлар муддатидан олдин талабасиз, бундай имкониятдан ғурурланиб, хурсанд бўлиб юринглар”, деди. Буни эшитиб беҳад қувондик.
2003 йили Тайлоқ туманида туғилганман. Ҳозир интернатда таҳсил оляпман. Болалигимдан шашка билан шуғулланиб келаман. Турли мусобақаларда қатнашиб, фахрли ўринларни эгалладим. 2021 йили август ойида Болгарияда бўлиб ўтган жаҳон чемпионатида олтин ва кумуш медалларни қўлга киритдим. Бу ютуқларга эришишимда устозларимнинг сабоғи, ўгити мадад бўлди. Шу йилнинг 16-21 февраль кунлари Тошкентда ўтказиладиган шашка бўйича Ўзбекистон чемпионатига тайёргарлик кўряпмиз. Энди Самарқанд давлат универтитетининг рус тили ва адабиёти факультетига ўқишга кирмоқчиман. Оилада катта фарзандман, укам ва синглим бор. Онам ўқитувчи бўлиб ишлайди. Олдин умумий ўрта таълим мактабида ўқиганман. Бироқ соғлом болалар билан бирга ўқишга қийналардим. Бу ердаги ўқитувчилар бориб тавсиялар беришди. Ҳозир барча фанлардан аъло баҳолар олиб, ўқишни давом эттиряпман.
Маҳбуба ХАЛИЛОВА,
Самарқанд шаҳридаги 59-кўзи ожиз болалар мактаб-интернати ўқувчиси
Инсонларнинг эртанги кунга ишончини оширишни хоҳлайман
Президентимиз билан суҳбат чоғида кўнглимдаги кечинмаларим, орзуларим ҳақида сўзлаб бердим. У киши муддатидан олдин хоҳлаган олий таълим муассасасига киришимга имконият яратиб берилишини айтди. Бунинг учун давлатимиз раҳбарига миннатдорлик билдираман.
Самарқанд давлат универтитетида ўқиб, психолог бўлмоқчиман. Чунки инсонларнинг кечинмалари, муаммоларини тинглаб, уларнинг эртанги кунга ишончини оширишни, жамиятда ўз ўрнини топишига ёрдам беришни хоҳлайман. Бу муассасага Бахмал туманидан келганман. Оилада 6 фарзандмиз. Раҳматли отам ўқитувчи эди. Ҳозир онамнинг ёлғиз ўзи бизни катта қиляпти. Опам Самарқанд давлат университетида таҳсил олган. Унинг ҳам кўзи ожиз, Бахмал туманидаги 18-мактабда ишлайди. Ота-онам кўзимни даволатиш учун шифокорларга неча бор кўрсатди, ҳатто операция ҳам қилдирди, аммо туғма катаракта ташхиси қўйилди. Кўзим тузалишига умид йўқлигини билганимда жуда қийналдим. Бу мактабда биз учун барча шароит мавжуд. Айниқса, меҳрибон ва билимли устозларимиз кўмаги катта далда бўлмоқда. Кўзи ожизлар ўртасида ўтказилган шахмат мусобақаларида қатнашиб, 6 маротаба Ўзбекистон чемпиони бўлдим. Бу йил 10-17 июль кунлари Францияда бўлиб ўтадиган жаҳон чемпионатига йўлланма олдим. Ҳаяжондаман, биринчи ўринни олишни ният қиляпман. Ўзбекистон номини, байроғимизни юксакларга кўтариб келмоқчиман.
Дурдона ЖУМАНОВА,
Самарқанд шаҳридаги 59-кўзи ожиз болалар мактаб-интернати ўқувчиси
Бизга насиб этган бахт
Бугун 35 миллион аҳоли орасида Президентимиз билан учрашиш бизга насиб қилди. Шуларнинг ичида 10 миллиондан зиёди талаба-ўқувчи ёшлар бўлиб, айнан бизнинг мактабимиз танлаб олингани бошимизни кўкка етказди. Қувончимни оддий сўзлар билан таърифлаб беролмайман.
Давлатимиз раҳбарининг қўлини ушлаб, табригини эшитдик. Бу барчамизга куч ва мамнунлик бағишлади. Президентимиз келажакда ўзимиз истаган ўқув юртига киришимизни, уни тугатгач эса, иш билан таъминланишимизни таъкидлади. Биз, ёшларга ўқиш давомида бундан кейин ҳеч қандай муаммо бўлмаслигини айтди. Келажакда математика ва информатика йўналиши бўйича ўқишга кирмоқчиман. Ҳатто магистратура, докторантурада ўқишни давом эттиришни олдимга мақсад қилиб қўйганман. Энг катта орзуларимдан бири — чекка ҳудудларда, назардан четда қолиб кетган қишлоқларда ҳам кўзи ожиз болалар учун мўлжалланган ўқув марказлари ташкил қилиб, у ердаги билимга чанқоқ ёшларга дарс бериш. Мактабимизда математика тўгараги мавжуд. Бу каби тўгараклар, дарслардаги қизғин баҳслар орқали метематикага меҳрим ортиб боради. Турли мисол ва масалаларни завқ билан ишлайман. Келгусида шу фан бўйича юксак марраларга эришаман. Ахир, бугунги ҳаётни информатикасиз тасаввур қилиб бўлмайди-да. Қашқадарё вилоятида катта оилада туғилганман. Мен каби кўзи ожиз яна икки укам бор. Бир укам шу мактабда ўқийди. Ўтган йили Республика мусобақасида илк ғолибликни қўлга киритди.
Одина ШОВДИРОВА,
Самарқанд шаҳридаги 59-кўзи ожиз болалар мактаб-интернати ўқувчиси
Кечаси билан ухлолмай чиққаним сабаби
Президентимиз билан кўришишни тасаввур қилолмасдим. Кечқурун бу хабарни эшитиб, жуда хурсанд бўлдим. Ҳаяжоним ичимга сиғмади. Кечаси билан ухлолмай чиқдим, бобомиз биз билан кўришармикан, мактабимизга келармикан, деб ўйладим.
Эртаси куни Президентимизга олган мукофотларим, совринларим, орзуларим ҳақида сўзлаб бердим. Ғолиблик шоҳсупасига кўтарилсам, ғалабамни сизга бағишлайман, деганимда Президентимиз жуда хурсанд бўлиб кетди. “Агар чемпион бўлсанг, сени Тошкентга чақириб, ўзим тақдирлайман”, деди. Ҳозир 11-синф ўқувчисиман. Шашка бўйича 2 карра Ўзбекистон чемпиониман. Келгусида Самарқанд давлат чет тиллар институтига ўқишга кирмоқчиман. Тил ўрганишга жуда қизиқаман, ҳозир инглиз тили бўйича тайёрланяпман. Энг катта орзум — ўқишни битирганимдан кейин туғилган жойим — Тайлоқ туманида ўқув маркази очиб, хорижий тиллардан дарс бериш.
Мусурмон ҲАСАНОВ,
Самарқанд шаҳридаги 59-кўзи ожиз болалар мактаб-интернати ўқувчиси
