Мурожаатда айтилишича, истеъмолчи “Сардор қурилиш саноат” МЧЖ билан муддатли тўлов эвазига хонадон сотиб олиш мақсадида шартнома имзолаган ва бошланғич тўлов сифатида 16 миллион) сўм тўлаган. Кейинчалик уй сифатсизлиги учун тўлаган маблағини қайтариб олишга аҳд қилган, бироқ буюртмачи пулни қайтариб беришни кечиктирган. Мурожаат ўрганилиши натижасида 16 миллион сўмнинг истеъмолчи фойдасига ундирилишига эришилди.
Яна бир мурожаат Уйчи туманида яшовчи С.Мамадалиевадан келган. Унда қайд этилишича, фуқаро 2021 йил август ойида чорвачиликни ривожлантириш максадида имтиёзли кредит олиш учун тижорат банкларидан бири билан 30 миллион сўмлик шартнома имзолайди. Истеъмолчига таъминотчи томонидан 10 бош зотли қўй берилади. Афсуски, орадан ҳеч қанча вақт ўтмай, қўйлар касаллана бошлайди.
Ветеринар текширганда эса қўйларнинг жигари касаллангани маълум бўлади.
Фуқаро шу куннинг ўзида банк ходимларига мурожаат қилади, аммо банк маъмурлари пул таъминотчининг фирмаси ҳисобрақамига ўтказилганини айтади. Истеъмолчи шундан сўнг таъминотчи билан боғланиб, вазиятни тушунтиради, лекин фойдаси бўлмайди. Таассуфки, бир ҳафтага бормай қўйларнинг ҳаммаси нобуд бўлади. Мурожаат ўрганилиши натижасида истеъмолчининг 30 миллион сўмлик кредит маблағи таъминотчи томонидан қоплаб берилишига эришилди, дейилади федерация ахборот хизмати хабарида.
