Бугун эрта тонгдан «Долзарб 40 кунлик» акцияси доирасида, Давлатобод туманида қурилиши бошланган «Янги Наманган» шаҳарчаси бўйлаб дарахт ўтқазилди.
Жараёнда Наманган вилоят ҳокими Шавкатжон Абдураззоқов, нуронийлар, маҳалла фаоллари, корхона, ташкилот раҳбарлари, ёшлар ва кенг жамоатчилик иштирок этди ва Наманганни яшил ҳудудга айланишига муносиб ҳисса қўшишди.
Маълумот ўрнида, Давлатобод туманининг "Юксалиш" ҳамда Тўрақўрғон туманининг "Еттикон" маҳаллалари ҳудудидан яшил макон учун 1 минг 371 гектар ер ажратилган. Бу ҳудудда «Янги Наманган» шаҳарчасини барпо этиш учун қурилиш ишлари аллақачон бошлаб юборилганди.
Майдон фақатгина бинолардан иборат бўлган жой эмас, балки экологик мусаффолик мавжуд бўлган ҳудудга айланади. Шу боис ҳам«Яшил ҳудуд» 65 гектарлик «Янги Ўзбекистон боғи» барпо этилмоқда.
Бугунги дарахт экиш акциясида йиғилганлар мазкур боғ лойиҳаси тақдимоти билан ҳам танишишди ва боғга илк дарахтларни ўтқазишди.
«Янги Наманган» шаҳарчаси тўлиқ қуриб битказилганда аҳолига шу ернинг ўзида яшаши, ишлаши ва дам олиши учун барча қулайликлар яратилади.
Натижада 2026 йилга бориб "Янги Наманган" шаҳарчаси бир миллион аҳоли истиқомат қиладиган йирик ва яшил шаҳарга айланади.
