Наманган вилоятида “Кўмир таъминот” масъулияти чекланган жамияти вилоят филиали бошлиғи ўринбосари ўзининг юқори лавозимларда ишловчи танишлари орқали фуқарони туманлардан биридаги кўмир омбори раҳбари лавозимига тайинлаш ҳамда омборга келувчи кўмир ортилган юк вагонлари сонини кўпайтириб бериш эвазига 40 000 АҚШ доллари талаб қилган.
Маълум қилинишича, жорий йилнинг 6 декабр куни у сўралган маблағнинг 25 000 АҚШ долларини филиал ишчиси орқали олиб, фуқарони омбор мудири лавозимига тайинланишини таъминлаган.
Кейинчалик эса мансабдор шахс қолган 15 000 АҚШ доллари, шунингдек омборга кўмир ортилган 30 та вагон юборилгани учун “улуш” сифатида 7 500 АҚШ доллари — жами 22 500 АҚШ доллари талаб қилган. Ушбу маблағ воситачи бўлган филиал ишчиси орқали олинаётган вақтда Давлат хавфсизлик хизмати ҳамда Иқтисодий жиноятларга қарши курашиш департаменти ходимлари томонидан ноқонуний ҳаракатларга чек қўйилган.
Ҳозирда мазкур шахсларга нисбатан Жиноят кодексининг 168-моддаси 4-қисми “а” банди ва 211-моддаси 3-қисми “а” банди билан жиноят иши қўзғатилиб, “қамоқ” эҳтиёт чораси қўлланган.
Шунингдек, кўрилган чора-тадбирлар натижасида аҳолига кўмир маҳсулотларини ўз вақтида ва имтиёзли нархларда етказиб берилиши йўлга қўйилган.
