“Шимолий Атлантика блоки Шарқий Европада ҳарбий кучларини тўплаётгани йўқ. Лекин Беларусдаги вазиятни синчковлик билан кузатмоқда”, деди НАТО расмий вакили Оана Лунгеску. Унинг таъкидлашича, Шимолий Атлантика блоки ҳарбий кучлари ҳеч кимга хавф солмайди. У мудофаа характерига эга бўлиб, ҳудудда тинчликни сақлаш ва можароларнинг олдини олиш билан шуғулланади.
Якшанба куни Беларус президенти Александр Лукашенко Минскда ўз тарафдорлари ўтказган намойишда сўзга чиқиб, мамлакат чегарасига яқин жойда НАТО кучлари тўпланаётганини айтган эди. Унинг қайд этишича, танк ва самолётлар мамлакат чегарасидан 15 дақиқалик узоқда турибди.
Маълумки, 9 август куни Беларусда президент сайлови бўлиб ўтди. Унда амалдаги давлат раҳбари Александр Лукашенко 80,1 фоиз сайловчилар овозини олиб, ғолиб чиқди. Унинг рақиби Светлана Тихоновскаяга эса 10,12 фоиз сайловчилар овоз берган. С. Тихоновская сайлов натижаларини тан олмади. Шу боис мамлакатда икки томон тарафдорлари митинг ва намойишлар уюштиряпти.
