Бу ҳақда агентлик матбуот хизмати хабар берди.
Жумладан, Россияга Қозоғистон орқали йўл олган фуқаро Атирау вилоятида йўл-транспорт ҳодисасига учраб, оғир жароҳат олган. У бир нечта жарроҳлик амалиётини бошдан кечирган. Кейинчалик шифокорлар хулосасига кўра, уни Ўзбекистонга олиб келишга рухсат берилган.
Маълум қилинишича, фуқаронинг бўйин умуртқасининг бешинчи қисми синган ва орқа мия фаолияти зарарланган. У интенсив терапия назорати остида Ўзбекистонга олиб келиниб, Республика шошилинч тиббий ёрдам илмий марказига жойлаштирилган. Ҳозирда унинг аҳволи қониқарли.
Шунингдек, Латвияга мустақил равишда ишлаш учун борган яна бир фуқаро кафолатланган иш ўрни билан таъминланмагани оқибатида кучли руҳий босимни бошдан кечириб, инсультга учраган. Даволанишдан сўнг у ҳам Ватанга қайтарилган.
Миграция агентлиги хорижда қийин вазиятга тушиб қолган фуқароларга зарур ёрдам кўрсатиш ишлари давом эттирилаётганини билдирди.
