Бу ҳақда Dagbladet газетаси Нурланн вилояти полицияси штаби раҳбари Бент Эйлертсенга таяниб хабар берди.
Аввалроқ VG газетаси Норвегияда йўловчи поезди рельсдан чиқиб кетгани, енгил жароҳатлар борлиги ҳақида хабар берган эди. Нашр йўловчилар эвакуация қилинаётганини ёзган. Нурланн вилояти полицияси вакили Кеннет Лауритсеннинг айтишича, поезднинг рельсдан чиқиб кетишига тоғдаги ўпирилиш сабаб бўлган бўлиши мумкин.
“Биз уч кишини шифохонага, бир кишини навбатчи тиббий ёрдам хизматига олиб бордик, бир киши вафот этди”, дея Эйлертсен сўзларидан иқтибос келтиради газета.
Вилоят полицияси бошлиғининг айтишича, қолган жабрланганлар енгил жароҳат олган. Унинг қўшимча қилишича, ҳозирда поезд билан боғлиқ вазият назорат остида, йўловчилар Му-и-Рана шаҳридаги эвакуация марказларига олиб кетилмоқда. Нашрнинг аниқлик киритишича, поездда 55 нафар йўловчи бўлган, деб хабар беради ria.ru.
