Чунки ходимлар ўз касбини янада мукаммал ўрганишни истайди.

Самарқанд агроинновациялар ва тад­қиқотлар институтида Европа Иттифо­қининг “Erasmus+” дастури томонидан молиялаштирилган Озиқ-овқат иннова­циялари бўйича очиқ университет лойи­ҳаси айнан шу мақсадда йўлга қўйилган. 2024 йил февралда бошланган лойиҳада Европа Иттифоқи мамлакатларидан икки­та, Тожикистондан учта, Ўзбекистондан эса иккита олий таълим муассасаси ишти­рок этяпти.

Уни амалга оширишдан мақсад Марказий Осиё университетларида озиқ-овқатни қайта ишлаш технологияси йўналиши бўйича кун­дузги таълим шаклида ўқиётган талабалар билан бирга ташқи талабалар иштирок этадиган таълимнинг янги шаклини ишлаб чиқиш ва жорий қилишдан иборат.

Лойиҳа доирасида Европа Иттифоқидаги етакчи университетларнинг малакали про­фессор-ўқитувчилари иштирокида озиқ-ов­қатни қайта ишлаш технологиялари таълим йўналишига оид 7 та янги ўқув режаси ҳам­да модуллари ишлаб чиқилди. Беш профес­сор-ўқитувчимиз Латвияга малака оширишга юборилди. Малака ошириш давомида улар сут, гўшт, мева-сабзавот ва донни қайта иш­лаш технологияси ҳамда янги озиқ-овқат маҳсулотларини ишлаб чиқиш каби олтита фан модулини чуқур ўрганиб қайтди. Бундан ташқари, озиқ-овқат сифати ва хавфсизлиги бўйича 4 профессор-ўқитувчимиз Словакия­нинг Нитра қишлоқ хўжалиги университети­да малака оширишга юборилди.

2025/2026 ўқув йилидан институтимизда “Дон маҳсулотларини қайта ишлаш техноло­гияси” ҳамда “Академик матн” фан модулла­ри бўйича синов тариқасида ўқитиш жараёни бошланган. Очиқ таълим шаклидаги ушбу машғулотларда бакалавриат ва магистратура босқичи талабалари, профессор-ўқитувчилар, озиқ-овқат саноати корхоналари вакиллари, жумладан, “Агромир” ва “Мева-Мароқанд” МЧЖ ходимлари, турли олий таълим муассасалари тадқиқотчилари иштирок этмоқда.

Дарслар сифатини янада ошириш мақса­дида жорий йил октябрда Латвия ҳаёт фан­лари ва технологиялари университети ҳамда Словакиянинг Нитра қишлоқ хўжалиги уни­верситетидан мутахассислар келиб, талаба ва тингловчиларга назарий ҳамда амалий билим берди. Муҳими, мазкур ўқитиш модели озиқ- овқат саноатида фаолият юритаётган мута­хассислар малакасини ошириш, меҳнат бо­зоридаги рақобатбардошлигини кучайтириш билан бирга талабаларнинг амалий кўникма­ларни чуқурроқ эгаллашига кўмаклашмоқда.

Лойиҳа доирасида институтда “Дон маҳ­сулотларини қайта ишлаш технологияси” фан модулини ўқитиш учун замонавий лаборато­рия жиҳозлари, яъни қолипли нон пишириш печлари ўрнатилди.

“Очиқ университет” лойиҳаси доирасида керакли фан модули ўқитиб бўлинганидан кейин тингловчиларга сертификат берила­ди. Ҳозирча корхона ва ташкилотлардан 12 талабгор ушбу лойиҳа бўйича ўқиди, яъни касбига доир сирларни чуқур ўрганди. Бу тамойил асосида касб ўрганмоқчи бўлган та­лабгорларни келгусида ҳам ўқитиш, уларнинг меҳнат бозорида етук мутахассис бўлиб ети­шишига кўмаклашиш ниятидамиз.

Шавкат ҲАСАНОВ,

Самарқанд агроинновациялар ва

тадқиқотлар институти ректори, профессор