Олий Мажлис Қонунчилик палатаси Демократик институтлар, нодавлат ташкилотлар ва фуқароларнинг ўзини ўзи бошқариш органлари қўмитасининг кенгайтирилган йиғлиши бўлиб ўтди. Унда қўмита аъзолари оғир ижтимоий аҳволга тушиб қолган хотин-қизларга ёрдам кўрсатиш ҳамда уларни манзилли қўллаб-қувватлаш чораларини кучайтиришга қаратилган — “Ўзбекистон Республикасининг айрим қонун ҳужжатларига ўзгартиш ва кўшимчалар киритиш тўғрисида”ги қонун лойиҳасини муҳокама қилди.
Таъкидланганидек, мазкур қонун лойиҳаси давлатимиз раҳбарининг “Зўрлик ишлатишдан жабр кўрган хотин-қизларни реаблитация қилишга оид қўшимча чора-тадбирлар тўғрисида”ги қарори ижросини таъминлаш мақсадида ишлаб чиқилган. Қонун лойиҳаси амалдаги қонунчиликда белгиланган тартиб-таомилларга мувофиқ киритилган бўлиб, ушбу ҳужжат билан “Фуқароларнинг ўзини ўзи бошқариш органлари тўғрисида”ги, “Хотин-қизларни тазйиқ ва зўравонликдан ҳимоя қилиш тўғрисида”ги, “Аҳолини рўйхатга олиш тўғрисида”ги қонунларга ўзгартиш ва қўшимчалар киритиш таклиф этилмоқда.
Лойиҳа билан фуқаролар йиғини маҳалла ҳудудида тазйиқ ва зўравонлик қилган ёки қилишга мойиллиги бўлган шахсларни аниқлаш ва улар билан олиб бориладиган профилактика ишларида иштирок этиши белгиланмоқда.
Қолаверса, меҳнат органлари томонидан оғир ижтимоий аҳволда қолган, иш қидираётган хотин-қизлар бандлигини таъминлаш, уларни тадбиркорликка жалб қилиш, касбга йўналтириш чораларини кўриши белгиланяпти.
Қонун лойиҳанинг қабул қилиниши оғир ижтимоий аҳволга тушиб қолган хотин-қизларга ёрдам кўрсатиш ва уларни қўллаб-қувватлашнинг ҳуқуқий асосларини кучайтиришга хизмат қилади, деб хабар беради Олий Мажлис Қонунчилик палатаси матбуот хизмати.
