Албатта, фарзандларимиз учун бугунги имконият ва шарт-шароитлар нафақат бахт, балки энг улуғ неъмат, чексиз имкон, пўлат қанот демакдир. Сабаби эса кундек равшан. Ёшларнинг ҳар бир кунини имконга, ҳаракатларини уммонга, орзу-истакларини эса қонунга айлантираётган муносиб давлат раҳбари бор бу мамлакатнинг. Дарҳақиқат, юртимизда ёшлар сиёсати бир ижтимоий дастур эмас, балки мамлакатнинг миллий хавфсизлиги, иқтисодий барқарорлиги ва интеллектуал салоҳиятини белгиловчи бош стратегик йўналишга айланди.
2026 йил 24 февраль куни «Кўксарой» қароргоҳида бўлиб ўтган Президент ва ёшлар мулоқоти давлат ва халқ ўртасидаги очиқ мулоқотнинг янги саҳифаси сифатида тарихга кирди. Бугунги ислоҳотларнинг марказида айнан илмли, шижоатли ёшлар турибди. 60 мингдан ортиқ иштирокчи қамраб олинган ушбу тадбир умуммиллий кенгаш даражасига кўтарилди.
Шу мулоқотда Президентимиз 22 миллиондан ортиқ ёшларни «мамлакатнинг иқтисодий, ижтимоий ва сиёсий кучи» деб атади. Айтиш керакки, бу улкан кучнинг пешқадамлари қаторида 22 минг нафар Фарғона давлат университети ёшлари ҳам бор. Университетда 30 ёшгача бўлган талабалар сони 22 минг нафардан зиёдни ташкил этади. Улар шу эл, шу юрт учун муносиб давомчи бўлиб етишиш йўлида тинмай ўқиб-изланмоқдалар. Шу кунга қадар олийгоҳдан 207 нафар чемпион етишиб чиққан бўлса, Ёшлар Пара Осиё ўйинларида 10 та медаль қўлга киритилди.
Математика, кимё ва биология бўйича халқаро фан олимпиадаларида талабалар 7 та кумуш ва бронза медалига сазовор бўлдилар. Шунингдек, замонавий иссиқхоналар ва коворкинг марказларида дуал таълим кучайтирилди, натижада битирувчиларнинг 97 фоизи бандлиги таъминланди. Маррани баланд олган талабаларимизнинг 13 та стартап лойиҳаси орқали 9 миллиард 814 миллион сўм инвестиция жалб этилди. «Бўлажак олим» танловида эса 1 миллиард сўмдан ортиқ маблағ қўлга киритилди.
Эндиликда Президентимиз ташаббуси билан инновацион стартапларга 100 минг долларгача инвестиция киритишга рухсат берилгани бу каби ютуқларни янада кўпайтиради.
Учрашувда ҳафтанинг ҳар пайшанба куни «Ёшлар куни» этиб белгиланиши эса «Ҳеч бир ёш эътибордан четда қолмайди» деган эзгу ғояга асосланди. Демак, энди ёшларнинг ўз куни бор, шу кунни у ҳар ҳафта кутади, ҳозирлик кўради ва айнан марказда ўзи турганини англаган ҳолда эртанги масъулиятини ҳам кучлироқ англаб боради. Атрофида жаранглаётган "бугун ёшлар куни" сўзлари уни куннинг эгасига айлантириб боргани ҳолда, ҳар кунига мазмун олиб киради.
Ҳатто ҳаёт йўлида адашган, "иккинчи имкон"га муҳтож ёшларга ҳам давлат ғамхўрлик қилиши — Янги Ўзбекистоннинг бағрикенглик ва инсонпарварлик фалсафаси нақадар юксак эканидан далолат беради. Чунки инсон ҳаёти — мураккаб йўл. Бу йўлда кимдир билиб, кимдир билмай хато қилади, кутилмаганда адашиши ёки алданиши мумкин. Аммо жамиятнинг буюклиги унинг жазолашида эмас, балки йиқилганни суяб, унга қайта оёққа туриш учун қўл узата олишида намоён бўлади. Жазо муддатини ўтаб чиққан ёш йигит ёки қиз учун озодликка чиққандан кейин жамиятга қайта қўшилиб кета олиш маънан осон бўлмайди. Эндиликда адашган ёшлар тақдирнинг ҳукмига ташлаб қўйилмайди. Улар 8-12 ой давомида замонавий дунёнинг энг қудратли қуроллари — IT технологиялари, веб-дизайн ва хорижий тиллар бўйича интенсив билим оладилар. Бу дегани, кечагина жамиятдан ажратилган шахс эртага глобал бозорда рақобатлаша оладиган дастурчи ёки муҳандис бўлиб етишиб чиқади.
Нима учун айнан дастурлаш ва компьютер муҳандислиги? Чунки рақамли оламда инсоннинг ўтмиши эмас, унинг бугунги салоҳияти ва мантиқий фикрлаши қадрланади. Президентимиз томонидан илгари сурилган бу ташаббус шундай ёшларимизни яна ўзликка қайтишида суянч, ҳақиқий қанот бўлади. Демакки, бу йўлда миллат етакчиси кечиримлилик билан иш олиб борар экан, биз зиё аҳли бу ибрат моҳиятини ҳаммадан ҳам кўпроқ тушунишимиз зарур ва керак.
Президентимиз жорий этаётган гаровсиз кредитлардан Гарвардда ўқишгача, ипотека ёрдамидан тортиб китобхонлик грантларигача бўлган бу йўл Ўзбекистон ёшлари учун тўшалган орзулар манзилидир. Кўриниб турибдики, ёшлар учун берилаётган имтиёзлар уларнинг ўз Ватанида бахтли қилиш учун хизматга шай этилмоқда. Бутун миллатнинг маънавий ва интеллектуал қиёфасини намоён қилгувчи ёшлар экан, Муҳтарам Президентимизнинг ташаббусларини ҳаётга татбиқ этишда Фарғона давлат университети жамоаси бир тан-у бир жон бўлиб ҳаракат қилишдан асло толмайди.
Одилжон РАҲМАТОВ,
Фарғона давлат университети,
Физика-математика факультети декани ўринбосари
педагогика фанлари бўйича фалсафа доктори, PhD
