Ушбу вазифалар ижросини таъминлаш мақсадида бугунги кунда бир қатор ишлар амалга оширилмоқда. Жумладан, фармон ижроси юзасидан 2022-2024 йилларга мўлжалланган “Олмалиқ КМК” АЖ “Нодир металлар ва қаттиқ қотишмалар илмий ишлаб чиқариш бирлашмаси”ни ривожлантириш ва янги маҳсулотларни ўзлаштириш дастури ишлаб чиқилди.
Дастурнинг биринчи йўналиши бўйича молибден ишлаб чиқаришни 2023 йилда 800 тоннадан 1200 тоннага кўпайтириш лойиҳасини амалга ошириш белгиланган.
Мазкур вазифанинг ижросини таъминлаш мақсадида Мис эритиш заводининг Камёб металлар ишлаб чиқариш сехи кенгайтирилмоқда.
Сех бошлиғи Иззатулла Дониёровнинг маълум қилишича, айни кунларда ушбу сехдаги мавжуд 4 та печга қўшимча яна 2 та печ қурилмоқда. Бу печларни март ойида ишга тушириш мўлжалланмоқда. Ушбу печлар комбинатнинг ўзида ишлаб чиқарилган ва ишлаб чиқариш қуввати чет элникига нисбатан 30%га юқори. Печларни ўрнатиш ишлари ҳам комбинатнинг “Олмалиқметаллургқурилиш” трести ишчилари томонидан амалга оширилмоқда.
Молибден таркибли рудалардан ушбу сехда маҳсулот олинмоқда. “Ёшлик-1 конини ўзлаштириш” инвестициявий лойиҳаси доирасида барпо этилаётган 3-Мис бойитиш фабрикадан келадиган ярим тайёр маҳсулотлар ҳам ушбу сехда қайта ишланади.
Бундан ташқари, сехнинг ярим тайёр маҳсулотларни сақлаш омбори ҳам кенгайтирилмоқда.
Сехда асосан таркибида миқдори 25%дан кам бўлмаган молибден куйиндиси ҳамда таркибида 69,3% кам бўлмаган рений бўлган перранат аммоний олинади.
Молибден куйиндисини комбинатнинг ўзида чуқур қайта ишлаш йўлга қўйилган, перранат аммоний эса тўлиқ экспортга жўнатилади.
Маълумот ўрнида шуни айтиш мумкинки молибдендан металларни легирлашда, қаттиқ қотишмали технологик ускуналар тайёрлашда фойдаланилади. Перранат аммонийдан эса ҳарбий мақсадларда ракеталарда, радиотехникада ҳамда катализаторларда фойдаланилади.
Ҳозирги кунда сехда йилига 750 тонна молибден куйиндиси олинаётган бўлса янги печларнинг ишга туширилиши ҳисобига бу кўрсаткич 1200 тоннага етказилади.
