Йиғилишда МДҲ Парламентлараро Ассамблеяси Кенгаши раиси, Россия Федерацияси Федерал Мажлиси Федерация Кенгаши раиси Валентина Матвиенко, Қозоғистон Республикаси Парламенти Сенати раиси Маулен Ашимбаев, Озарбайжон Республикаси Миллий Ассамблеяси спикери Соҳиба Али қизи Гафарова, Арманистон Миллий Ассамблеяси раиси Ален Симонян, Беларус Республикаси Миллий Мажлиси Республика Кенгаши раиси Наталя Кочанова, Қирғизистон Республикаси Жогорку Кенеши раиси Талант Мамитов, Тожикистон Республикаси Мажлиси миллий Мажлиси Оли раиси Рустам Эмомали, шунингдек, МДҲ ПАга аъзо давлатлар парламент делегациялари, халқаро ташкилотлар раҳбарлари ҳам иштирок этяпти.
Тадбир аввалида делегациялар раҳбарлари Мустақил Давлатлар Ҳамдўстлиги давлатлари раҳбарларининг табрикларини ўқиб эшиттирди. Хусусан, Сенат Раиси мажлис иштирокчиларининг эътиборини Ўзбекистон Республикаси Президенти Ш.М. Мирзиёевнинг табригига қаратди.
Унда ўтган давр мобайнида Парламентлараро Ассамблея Ҳамдўстлик мамлакатлари ўртасидаги кўп қиррали ҳамкорликнинг энг долзарб масалаларини муҳокама қилиш учун муҳим майдонга айлангани алоҳида қайд этилган.
Ўзбекистон Республикаси Олий Мажлиси Ассамблея фаолиятида, парламентлараро ҳамкорликни мустаҳкамлашда фаол иштирок этаётгани алоҳида таъкидланди. Ўзбекистон МДҲ Парламентлараро Ассамблеяси доирасида Ҳамдўстлик мамлакатлари ўртасида тинчлик, барқарорлик, дўстлик, ишонч ва яхши қўшничилик муносабатларини мустаҳкамлаш борасидаги фаол ишларини давом эттириш ниятида эканлиги қайд этилди.
Парламентлараро Ассамблея Кенгашининг юбилей мажлиси давом этади.
Олий Мажлис Сенати Ахборот хизмати.
